नवी दिल्ली - देशभरात कोरोनाची स्थिती बिकट असताना सोशल मीडियावर काही बनावट बातम्या, माहिती शेअर केली जात असल्याचे समोर आल्यानंतर केंद्र सरकारकडून कारवाई केली जात आहे. शनिवारी केंद्र सरकारकडून मिळालेल्या सूचनांनुसार ट्विटरकडून अनेक ट्विट काढून टाकण्यात आली आहेत. मिळालेल्या माहितीनुसार या ट्विटद्वारे बनावट बातम्यांचा, माहितीचा प्रसार केला जात होता. लसीकरणासंदर्भात विनाकारण खोटी माहिती पसरवली जात होती.
ट्विटरच्या प्रवक्त्याने काही ट्वीट काढून टाकल्याच्या वृत्ताला दुजोरा दिला आहे. भारत सरकारच्या कायदेशीर विनंतीला उत्तर म्हणून ही कारवाई केली गेली आहे. कोविड-19 संबंधित चुकीच्या माहितीवर उपाय म्हणून त्याची पडताळणी करण्यासाठी आम्ही तंत्रज्ञान आणि मानवी समीक्षा वापरत आहोत. या धोरणानुसार तक्रार मिळाल्यानंतर आम्ही वेगवेगळ्या पद्धतीने माहितीचा आढावा घेतो, जर त्यात नियमांचे उल्लंघन आढळल्यास कारवाई केली जाईल. कोणतेही ट्विट डिलीट करण्यापूर्वी वापरकर्त्याला ईमेलद्वारेही त्याविषयी माहिती दिली जाते, असे ट्विटर प्रवक्त्याकडून सांगण्यात आले.
हेही वाचा - पीएम केअर फंड : देशातील सरकारी रुग्णालयात कार्यन्वित होणार 551 ऑक्सिजन निर्मिती प्लांट
दुसरीकडे, सरकारी सूत्रांनी दिलेल्या माहितीनुसार हे ट्वीट सरकारवर टीका केली म्हणून काढू टाकली आहेत, असे अजिबात नाही. या महामारीच्या काळात चुकीची, कालबाह्य माहिती आणि फोटो प्रसारित केल्यामुळे नागरिकांमध्ये गोंधळ निर्माणा होतो आणि लोकांमध्ये भीतीची परिस्थिती निर्माण झाली आहे. दिवसभर केवळ सरकारवर टीका करण्याचे काम करणाऱ्यांवर कोणतीही कारवाई केलेली नाही, टीका करणाऱ्यांवर कारवाई करण्याचा उद्देश नसून जे लोक खोटी माहिती पसरवत आहेत, त्यांच्यावर कारवाई करणे गरजेचे आहे, असे सांगण्यात आले.
एका वृत्तसंस्थेने दिलेल्या माहितीनुसार ज्यांचे ट्विट काढून टाकण्यात आले आहे, त्यामध्ये लोकसभेचे कॉंग्रेसचे खासदार रेवनाथ रेड्डी, बंगाल सरकारचे मंत्री मौली घटक, अभिनेता विनीत कुमार सिंह आणि दोन चित्रपट निर्माते विनोद कापरी आणि अविनाश दास यांचा समावेश आहे.
हेही वाचा - १८ वर्षांवरील नागरिकांचे कोविड लसीकरण : २८ एप्रिलपासून होणार नोंदणी सुरू
