हैदराबाद : टीआरएस आमदार के कविता (TRS MLC Kavitha) यांनी गुरुवारी सांगितले की, त्या आणि त्यांच्या पक्षाचे नेते जे सध्या ईडी आणि सीबीआयसारख्या केंद्रीय एजन्सीच्या रडारखाली आहेत, ते कोणत्याही चौकशीला सामोरे जाण्यास तयार आहेत. ईडीने दिल्ली दारू घोटाळ्यातील आरोपींपैकी अमित अरोरा याच्या रिमांड अहवालात नावाचा उल्लेख केला होता. (TRS MLC Kavitha on Delhi liquor scam case).
आम्हाला फाशी देणार का? : कविता म्हणाल्या, "आम्ही कोणत्याही प्रकारच्या चौकशीला सामोरे जाऊ. एजन्सी आल्या आणि आम्हाला प्रश्न विचारले तर आम्ही नक्कीच उत्तर देऊ. पण माध्यमांना निवडक लीक्स देऊन नेत्यांची प्रतिमा मलिन केली तर लोकं याचा विरोध करतील. भाजपने लोकशाही पद्धतीने निवडून आलेली आठ राज्यातील सरकारे पाडली आणि मागच्या दरवाजाच्या राजकारणातून सत्ता हिसकावून घेतली. मी मोदींना विनंती करते की त्यांनी ही वृत्ती बदलली पाहिजे. ईडी आणि सीबीआयचा वापर करून निवडणुका जिंकणे शक्य नाही. तेलंगणातील लोकं हुशार आहेत. आम्हाला तुरुंगात टाकलं तर जास्तीत जास्त काय होईल? आम्हाला फाशी देणार का? यात घाबरण्यासारखे काही नाही."
एजन्सींना निवडणूक असलेल्या राज्यांमध्ये पाठवले जाते : कविता पुढे म्हणाल्या की, ईडी आणि सीबीआय सारख्या एजन्सींना निवडणूक असलेल्या राज्यांमध्ये पाठवणे ही एक नियमित प्रथा बनली आहे. तेलंगणात पुढील वर्षी नोव्हेंबर किंवा डिसेंबरमध्ये विधानसभा निवडणुका होणार आहेत. त्या म्हणाल्या की, जोपर्यंत टीआरएस पार्टी लोकांच्या हिताचे काम करते आहे तोपर्यंत त्यांना काहीही होणार नाही. टीआरएस पक्षाचे कार्यकर्ते आपला पाठिंबा व्यक्त करण्यासाठी त्यांच्या निवासस्थानी मोठ्या संख्येने जमले होते.
ईडीचा तपास : आतापर्यंत केलेल्या तपासानुसार, विजय नायर यांनी आपच्या नेत्यांच्या वतीने अमित अरोरा यांच्यासह साऊथ ग्रुप (सरथ रेड्डी, सुश्री के. कविता, मागुंता श्रीनिवासुलु रेड्डी नियंत्रित) नावाच्या गटाकडून 100 कोटी रुपये घेतले आहेत, असे ईडीने म्हटले आहे. ईडीच्या म्हणण्यानुसार, अमित अरोरा यांनी त्यांच्या बयाना दरम्यान हे उघड केले. कविता ह्या तेलंगणाचे मुख्यमंत्री के चंद्रशेखर राव यांची मुलगी आहे.
