आज पंतप्रधान नरेंद्र मोदी मन की बात या त्यांच्या विशेष कार्यक्रमातून देशातील जनतेचे संबोधन करणार आहेत. ते कोरोना व नव्या डेल्टा प्लस व्हेरिएंटबाबत या कार्यक्रमातून बोलण्याची शक्यता आहे. त्याचबरोबर काश्मीर मुद्द्यावरही बोलण्याची शक्यता आहे.
केंद्रीय रक्षा मंत्री राजनाथ सिंह हे आज लेह-लद्दाख दौऱ्यावर आहेत. त्या ठिकाणी सैन्य दलाशी भेट घेतील व त्यांच्याशी चर्चा करतील.
आजाद समाज पक्षाचे राष्ट्रीय अध्यक्ष चंद्र शेखर आझाद आज मुंबईमध्ये पत्रकार परिषद घेणार आहेत. बृहन्मुंबई महापालिकेच्या आगामी निवडणुकीच्या पार्श्वभूमीवर ते ही पत्रकार परिषद घेणार असून निवडणुकीत ते आपले उमेदवार उतरविण्याची शक्यता आहे.
भारताची सुवर्णकन्या म्हणून ओळखली जाणारी धावपटू म्हणजे पी.टी.उषाचा आज जन्मदिवस आहे. 1980 मध्ये तिने प्रथम ऑलंपिकमध्ये पदार्पण केले. आंतरराष्ट्रीय स्पर्धेत ट्रँकसूटमध्ये धावणारी ती पहिली भारतीय महिला ठरली. 1982 मध्ये नवी दिल्ली येथे झालेल्या आशियाई स्पर्धेत तिने 100 व 200 मीटर धावण्याच्या स्पर्धेत दोन रौप्य पदके जिंकली. तर 1983 मध्ये कुवेतमध्ये झालेल्या आशियाई ट्रॅक अ‍ॅन्ड फिल्ड चँपियन्स स्पर्धेत तिने 400 मीटर स्पर्धेत विक्रमी वेळ नोंदवत सुवर्णपदक जिंकले. पी.टी. उषाने 1986 मध्ये सोल येथे झालेल्या दहाव्या आशियाई स्पर्धेत 4 सुवर्ण व 1 रौप्यपदक जिंकली होती. तिने आपल्या कारकिर्दीत 100 हून जास्त आंतरराष्ट्रीय पदके जिंकली आहेत.
संगीत क्षेत्रातील सुप्रसिद्ध संगीतकार आर.डी.बर्मन यांनी कंपोज केलेल्या संगीताची धून आजही प्रेक्षकांच्या मनावर अधिराज्य गाजवते. अशा आर.जी. बर्मन यांचा आज जन्मदिवस आहे. आर. डी. बर्मन यांचा जन्म २७ जून, 1939 मध्ये झाला होता. त्यांनी आपले शिक्षण पश्चिम बंगाल येथे पूर्ण केले होते. त्यांनी कंपोज केलेले पहिले गाणे त्यांच्या वडिलांनी 1956 मध्ये 'फंटुश' चित्रपटामध्ये वापरले होते. त्यांनंतर त्यांनी बऱ्याच चित्रपटांसाठी गाणी कंपोज केली. 4 जानेवारी, 1994 साली त्यांनी जगाचा निरोप घेतला.
राज्यात मान्सून दाखल झाला असून आज कोकण, मुंबईमध्ये मुसळधार पावसाची शक्यता आहे. या आठवड्यात पुणे जिल्ह्यात मध्यम स्वरुपाचा पाऊस होणार असल्याचा इशारा हवामान खात्याने दिला आहे.
देशात सुरू असलेल्या लसीकरण मोहिमेत आज राज्यातील सर्व जिल्ह्यांमध्ये लसीकरण होणार आहे. 1 मार्चपासून 60 वर्षांवरील वयोवृद्ध तसेच 45 ते 59 वर्षामधील विविध गंभीर आजार असलेल्या नागरिकांना लस दिली जात आहे. 1 मेपासून 18 ते 44 वर्षांमधील लाभार्थ्यांचे लसीकरण सुरू झाले आहे. राज्यात लसीचा पुरवठा होत नसल्याने अनेक वेळा लसीकरण ठप्प झाले आहे. राज्यात आतापर्यंत 3 कोटी 9 लाख 79 हजार 460 लसीच्या मात्रा देण्यात आल्या आहेत.लसीकरणात सातत्य टिकवत महाराष्ट्र देशात अग्रस्थानी आहे.
अधिक बातम्यांसाठी येथे क्लिक करा...
