नवी दिल्ली - देशात कोरोनाचा कहर असून रुग्ण संख्या वाढतच चालली आहे. कोरोना परिस्थिती, लसींचा तुटवडा, ऑक्सिजन कमतरता आदी मुद्द्यांवरून गेल्या काही दिवसांपासून काँग्रेसचे माजी अध्यक्ष आणि वायनाडचे खासदार राहुल गांधी केंद्र सरकारला लक्ष्य करत आहेत. आज राहुल गांधींनी पत्रकार परिषद घेत पंतप्रधान नरेंद्र मोदींवरी टीका केली. देशात पसरलेल्या कोरोनाच्या दुसऱ्या लाटेला पंतप्रधान मोदी जबाबदार आहेत, असे राहुल गांधी म्हणाले.
भारत हा जगातील वॅक्सीन कॅपिटल आहे. लसीकरण केल्यासच कोरोनापासून आपली सुटका होईल. जेथून लस खरेदी करता येईल. तेथून खरेदी करा आणि लसीकरण करा. सरकारने कारण देऊ नये. दुसऱ्यावर चुका ढकलणे नाही. तर मी करून दाखवेल, असं म्हणणं म्हणजे नेतृत्व. सरकारने आता वेळ वाया घालू नये. तसेच जे मदत करण्याचा प्रयत्न करत आहेत. सत्य सांगत आहे. मग ते विरोधी पक्ष असो किंवा राज्यांचे मुख्यमंत्री, जिल्हाधिकारी असो. त्यांचं सरकारने ऐकावं. दुसऱ्याला लाटेला हरवलं आहे, असे म्हणेपर्यंत कोरोनाची तीसरी लाटही येईल, असे राहुल गांधी म्हणाले.
कोरोनाच्या प्रसारात मोदींचा हात -
कोविडला मोविड लिहणाऱ्यावरून विचारलेल्या प्रश्नाला राहुल गांधींनी उत्तर दिले, की टुलकीटची गोष्ट पूर्णपणे खोटी आहे. मोदींनी प्रचार सभा घेत कोरोनाचा प्रसार होण्यास हातभार लावला. त्यामुळेच मी त्यांच्या नावाच्या पहिल्या अक्षराचा वापर केला. जेव्हा मोदी बंगालमध्ये प्रचार सभा घेत होते. तेव्हा ते कोविडची मदत करत होते. जेव्हा खरचं पाऊल उचलण्याची गरज होती. तेव्हा उचललं नाही. उलट कोरोनाची मदत केली, अशी टीका राहुल गांधींनी केली.
लसीकरण केल्यास कोरोनाचा पराभव शक्य -
कोरोनाचे नवे स्ट्रेन येत आहे. तो रुप बदलणारा आहे. मास्क वापरणे, सोशल डिस्टन्सिंग, निर्जंतुकीकरण हे कोरोनावरील अस्थायी समाधान आहे. लसीकरण हेच एकमेव कोरोनावरील स्थायी समाधान आहे. लवकरात लवकर लसीकरण करून आपण कोरोनाला हरवू शकतो. जगभरात कोरोनाचा कसा प्रसार होत असून त्याविरोधात ते कसे लढत आहेत, त्यांच्यापासून आपण शिकायला हवे, असे राहुल गांधी म्हणाले.
मी सांगितले, तेव्हा माझे ऐकले नाही....
लोकांचे प्राण वाचवणे गरजेचे आहे. विरोधी पक्ष शत्रू नाही. आम्ही सरकारला मार्ग दाखवण्याचा प्रयत्न करत आहोत. मात्र, ते ऐकत नाहीत. जर सरकारने आमचे ऐकले असते. तर कोरोनामुळे लाखो लोकांचे प्राण गेले नसते, असेही राहुल गांधी म्हणाले.
कोरोना मृत्यूचे सरकारी आकडे खोटे -
कोरोनासंदर्भात मी सुरवातीलाच लोकांना इशारा दिला होता. मात्र, मी त्यांना घाबरवत आहे, असे लोक म्हणाले. मात्र, मी त्यांना घाबरवत नव्हतो. मला त्यांची चिंता होती, असे राहुल गांधींनी सांगितले. मी काँग्रेस राज्यातील मुख्यमंत्र्याशी चर्चा केली असून त्यांना मृत्यूचे खरे आकडे मांडण्यास सांगितले आहे. मृत्यूचे खरे आकडेच आपल्याला या महामारीचा पराभव करण्यास मदत करतील. कोरोना मृत्यूचे सरकारी आकडे खोटे आहेत, असा दावा राहुल गांधींनी केला.
हेही वाचा - 'सकारात्मकता हा तर मृत्यूचे आकडे लपवण्यासाठी मोदींनी केलेला PR स्टंट'
