चमोली (उत्तराखंड): उत्तराखंडमधील चमोली येथे आज सकाळी मोठी दुर्घटना घडली आहे. अलकनंदा नदीच्या काठावर असलेल्या नमामि गंगे प्रकल्पाच्या सीवर ट्रीटमेंट प्लांटमध्ये मोठी दुर्घटना झाली. येथे काम करत असलेल्या 20ते 25 कामगारांना विजेचा शॉक लागल्याची घटना घडली आहे. विजेचा झटका लागल्याने अनेकजण गंभीर जखमी झाले आहेत. प्राथमिक माहितीच्या आधारे या दुर्घटनेत 17 जणांचा मृत्यू झाला आहे. जखमींना पिपळकोटी रुग्णालयात दाखल करण्यात आले आहे. पोलीस आणि बचाव पथक घटनास्थळी हजर झाले आहे. दरम्यान चमोली जिल्ह्याचे प्रभारी मंत्री धनसिंह रावत काही वेळात घटनास्थळी पोहोचत आहेत.
मृतदेह पाहण्यासाठी आलेल्या लोकांनाही विजेचा धक्का : चमोली येथील अलकनंदा नदीच्या काठावर बांधण्यात आलेल्या नमामि गंगेच्या प्रकल्पाच्या बाजूला ट्रान्सफॉर्मरचा स्फोट झाला. हा स्फोट इतका भीषण होता की, अनेकांना विजेचा धक्का लागल्याचे सांगण्यात येत आहे. दरम्यान चमोली पोलिसांनी सांगितले की, नदीच्या काठावर एक मृतदेह पडलेला होता. घटना पाहण्यासाठी अनेक लोक गेले होते. त्यांनाही विजेचा धक्का बसला. नदीच्या काठावर नमामि गंगे प्रकल्पांतर्गत काम सुरू असल्याचे काही रिपोर्ट्समध्ये सांगण्यात येत आहे. येथे विजेचा धक्का लागून अनेक मजूर जखमीही झाले आहेत. बचाव आणि मदतकार्य सुरू करण्यात आले आहे. आज सकाळी प्रकल्पस्थळी तिसऱ्या टप्प्यातील वीज खंडित झाल्याचे स्थानिक आमदार म्हणाले. हा टप्पा पुन्हा जोडताच विद्युत प्रवाह पसरला. वीज महामंडळावर गुन्हा दाखल करावा, अशी नागरिकांनी मागणी केली आहे.
आदेश मुख्यमंत्र्यांनी दिले चौकशीचे आदेश : मुख्यमंत्री पुष्कर सिंह धामीने चमोली घटनेवर शोक व्यक्त केला असून त्यांनी या दुर्घटनेची चौकशी करण्याचे आदेश दिले. चमोलीचे पोलीस अधीक्षक परमेंद्र डोभाल यांनी सांगितले की, चमोली जिल्ह्यातील अलकनंदा नदीच्या काठावर ट्रान्सफॉर्मरचा विस्फोट झाल्याने अनेक लोकांचा मृत्यू झाला आहे. तर जखमी झालेल्या व्यक्तींचा आकडा ही मोठा आहे. जखमींना जिल्हा रुग्णालयात दाखल करण्यात आले आहे. रुग्णालयाबाहेर लोकांची गर्दी झाली आहे. याशिवाय रुग्णालय आणि घटनास्थळी उच्चपदस्थ अधिकाऱ्यांची गर्दी झाली आहे.
पोलीस उपनिरीक्षक आणि पाच होमगार्डसह सुमारे १५ जणांचा मृत्यू झाला आहे. या प्रकरणाचा तपास सुरू आहे. रेलिंगवर विद्युत प्रवाह पसरल्याने तेथे उपस्थित असलेल्या लोकांना विजेचा शॉक लागल्याचे प्रथमदर्शनी आढळून आले आहे. - व्ही मुरुगेसन, उत्तराखंडचे अतिरिक्त पोलीस महासंचालक
