नवी दिल्लीः मणिपूरमधील हिंसाचार अजून थांबलेला नाही. मणिपूर हिंसाचाराची झळ आता दिल्लीतील केंद्रीय गृहमंत्री अमित शाह याच्या निवासास्थानापर्यंत पोहोचली आहे. मणिपूर राज्यातील हिंसाचार प्रकरणी मणिपूरमधील कुकी जमातीच्या महिलांनी अमित शाह यांच्या निवासस्थानाबाहेर मोठ्या संख्येने निदर्शने केली. दरम्यान दिल्ली पोलिसांनी बॅरिकेड्स लावून महिलांना रोखण्याचा प्रयत्न केला.
गृहमंत्र्यांच्या निवासस्थानाबाहेर निदर्शने का केली : काही दिवसांपूर्वीच अमित शाह यांनी मणिपूरचा दौरा केला होता. राज्यात शांती प्रस्थापित होईल असे आश्वासन दिले होते. तरीही तेथील हिंसाचार थांबलेला नाही. यामुळे कुकी जमातीच्या महिलांनी आज केंद्रीय गृहमंत्री अमित शाह यांच्या निवासस्थानाबाहेर निदर्शने केले. आंदोलन करणाऱ्या महिलांनी सांगितले की, शांती निर्माण केली जाईल, असे सांगितल्यानंतरही मणिपूरमध्ये त्यांच्या जमातीच्या लोकांवर हिंसाचार केला जात आहे. मणिपूरमधील हिंसाचाराबद्दल कुकी समुदायाचे लोक संतप्त आहेत. मणिपूरमध्ये सततच्या हिंसक घटनांनंतर अजूनही परिस्थिती पूर्वपदावर आलेली नाही. त्यामुळेच शांततेची मागणी करत आम्ही शांततेत गृहमंत्र्यांना भेटायला आलो आहोत.
पोलिसांनी महिलांना अडवले : गृहमंत्र्यांना भेटायला आलेल्या कुकी समाजाच्या महिलांना दिल्ली पोलिसांनी बॅरिकेड्स लावून अडवले. आंदोलक अमित शाह यांच्याघराबाहेर पोस्टर घेऊन उभे होते. त्यानंतर पोलिसांनी आंदोलकांची मागणी आणि त्यांचे म्हणणे गृहमंत्र्यांपर्यंत पोहोचवले जाईल, असे आश्वासन आंदोलकांना दिले. त्यानंतर आंदोलक म्हणाले की, आमचा संदेश गृहमंत्र्यांना पाठवण्यात आले आहे. गृहमंत्री आमचे म्हणणे ऐकून आमची भेट घेतील,अशी आशा असल्याचे आंदोलनकर्त्या महिला म्हणाल्या. मणिपूरमध्ये कुकी आणि मीतेई समाजामध्ये हिंसाचार झाला आहे. गेल्या महिनाभरापासून मणिपूरमध्ये जातीय हिंसाचारामुळे तणावाचे वातावरण आहे. या हिंसाचारात 80 हून अधिक लोकांचा मृत्यू झाला आहे. हजारो लोक बेघर झाले आहेत. हजारो घरे जळून खाक झाली आहेत.
हेही वाचा
