हैदराबाद: महाराष्ट्रात झालेल्या राज्यसभा आणि विधानसभेच्या निवडणुक निकालात आघाडीसरकार मधिल नाराजी नाट्याचे पडसाद पहायला मिळाले. महात्वाकांक्षी भाजपने राज्यसभेत आणि विधानसभेतही मतांची जुळवणी करत आपल्या पारड्यात यश पाडुन घेतले आणि संशयकल्लोळ तयार झाला. काय झाले आहे हे समजण्या आधिच राज्यात मोठा भुकंप झाला. शिवसेनेचे वजनदार मंत्री एकनाथ शिंदे यांनी शिवसेना, अपक्ष असे सगळे मीळुन 25 आमदारांच्या गटाला घेऊन सुरत गाठले. सध्या त्यांच्या सोबत असलेले सगळे आमदार नाॅट रिचेबल आहेत. शिवसेना नाराजीचा फुटलेला बांध अडवणार का मग सरकार सोडणार असा पेच निर्माण झाला आहे.
सुरतचे हॉटेल नवे केंद्र: विधान परिषद निवडणुकीनंतर शिवसेनेतील अंतर्गत धूसफूस समोर आली. नेते एकनाथ शिंदे सोमवार सायंकाळपासून नॉट रिचेबल आहेत. त्यांच्यासोबत 25 पेक्षा जास्त आमदार असल्याचे सांगितले जात आहे. एकनाथ शिंदे यांच्या बंडामुळे राज्यातील सत्ताधारी महाविकास आघाडीतील बिघाडी समोर आली आहे. सर्वजण सुरतच्या ग्रँड भगवती या हॉटेलमध्ये सर्व जण असल्याची माहिती मिळत आहे. हॉटेलमधील सर्व खोल्या बूक आहेत. हॉटेलमध्ये कोणीही जाऊ नये यासाठी हॉटेलच्या बाहेर मोठ्या प्रमाणात पोलीस बंदोबस्त तैनात करण्यात आला आहे. त्या ठिकाणी कोणालाही जाऊ दिले नाही. महाराष्ट्रातील राजकीय भुकंपाचे नवे केंद्र आता सुरतचे ते हाॅटेल झाले असुन तेथे होत असलेल्या हालचालींवर सगळ्यांची नजर आहे.
काय आहे वाद: भाजपसोबत युतीत निवडणुक लढलेल्या शिवसेनेने सरकार स्थापनेच्या वेळी भाजपला वगळुन काॅंग्रेस आणि राष्ट्रवादी सोबत घरोबा करत महाविकास आघाडीचे सरकार मुख्यमंत्री उध्दव ठाकरे यांच्या नेतृत्वात स्थापन केले. सर्वाधिक आमदार निवडुन आलेले असतानाही भाजपला सत्ते पासून रोकण्यात आले. तेव्हा पासुन भाजपने शिवसेनेला लक्ष्य करण्याची एकही संधी सोडली नाही. सरकारच्या कारभारावर त्यातील मंत्र्यांवर कायम प्रहार केला. मोठ्या शहरातील वेगवेगळ्या प्रश्नावर आंदोलने केली. मशिदीवरील भोंग्याचा प्रश्न असो किंवा हनुमानचालीसा प्रकरण यात सरकारची कोंडी केली. तसेच मुख्यमंत्री आमदारांना तसेच इतर कोणाला भेटत नाहीत, आमदारांची कामे होत नाहीत असा प्रचार केला. त्याच बरोबर नाराज आमदारांशी जवळीक साधत त्यांच्याशी संबंध वाढवले.
विधानसभा निवडणुकीत मिळाले संकेत: देवेंद्र फडणवीस यांच्या चाणक्यनितीने राज्यसभेनंतर विधान परिषद निवडणुकीतही पाच उमेदवार निवडून आणत महाविकास आघाडीला हादरा दिला. आघाडीची तब्बल 21 मते फुटली. शिवसेनेची स्वत:ची आणि सहयोगी पक्ष आणि अपक्षांची तब्बल 12 मते फुटली. शिवसेनेचे 55 आमदार आहेत. प्रहार संघटनेचे 2, मंत्री शंकरराव गडाख आणि अपक्ष सहा अशी मिळून शिवसेनेकडे एकूण मतांची संख्या 64 इतकी आहे. मात्र, शिवसेनेच्या दोन्ही उमेदवारांना मिळून 52 मते मिळाली आहेत. त्यामुळे शिवसेनेचे 3 आणि घटक पक्षांची 9 अशी 12 मते फुटली. तर काँग्रेसचे देखील 3 आमदार फुटले. याचा फायदा भाजपच्या उमेदवाराला झाला त्याचवेळी महाविकास अघाडी आणि विशेषत: शिवसेनेत सर्वकाही अलबेल नाही हे स्पष्ट झाले होते.
राऊत म्हणतात हे सगळे गैरसमजातून: एकनाथ शिंदे हे आमचे जिवाभावाचे सहकारी आहेत. ते निष्ठावंत शिवसैनिक आहेत. त्यांच्याशी बोलत नाही तो पर्यंत काही बोलता येणार नाही. पण महाराष्ट्रात मध्य प्रदेश आणि राजस्थान पॅटर्न राबवण्याचा प्रयत्न सुरु आहे. पण हा प्रयत्न यशस्वी होणार नाही. आमचा काही आमदारांशी संपर्क होत नाही हे खर आहे. ते मुंबईत नाही. काही गैरसमजातून त्यांनी गुजरातला नेण्यात आले आहे. असा दावा शिवसेना खासदार संजय राऊत यांनी स्पष्ट केले आहे.एकनाथ शिंदेशी सुद्धा संपर्क झाला आहे. जे चित्र बाहेर निर्माण केलं जात आहे की भूकंप होईल किंवा अन्य काही होईल. त्यामध्ये कोणत्याही प्रकारचं तथ्य वाटत नाही.असेही राऊत यांनी म्हणाले आहे.
पवारांचे सर्व कार्यक्रम रद्द: महाराष्ट्राच्या राजकारणात भूकंप आला. शिवसेना नेते आणि नगरविकास मंत्री एकनाथ शिंदे यांच्यासह शिवसेनेचे जवळपास 20 पेक्षा जास्त आमदार नॉट रिचेबल आहेत. हे सर्व आमदार गुजरातमध्ये आहेत. विधानपरिषदेत शिवसेनेची फुटलेली मतं आणि एकनाथ शिंदे गट नॉट रिचेबल असल्यामुळे ठाकरे सरकार संकटात आहे. अशा परिस्थितीत महाविकास आघाडीचे सर्वेसर्वा आणि राष्ट्रवादी काँग्रेसचे अध्यक्ष शरद पवार यांनी आपले सर्व कार्यक्रम रद्द केले आहेत. शरद पवार सध्या दिल्लीत आहेत. शरद पवारांचा दिल्लीतील बंगला नेहमी रेलचेल असणारा भाग आहे. मात्र आज पवारांच्या घराबाहेर प्रचंड शांतता आहे. दुपारी विरोधी पक्षांची बैठक आहे.
शहांनी घेतली नड्डांची भेट: महाराष्ट्रात हा गोंधळ सुरु असताना केंद्रीय गृहमंत्री अमित शहा यांनी बुधवारी भारतीय जनता पक्षाचे अध्यक्ष जेपी नड्डा यांची भेट घेतली. शिंदे हे काही आमदारांसह सुरत शहरातील हॉटेलमध्ये तळ ठोकून आहेत, तर दुसरीकडे या दोन्ही नेत्यांची भेट झाली. महाराष्ट्र विधान परिषद निवडणुकीत सत्ताधारी महाविकास आघाडीला पराभवाचा सामना करावा लागला. त्या पाठोपाठ हा प्रकार समोर आल्यामुळे राज्याच्या राजकारणात मोठी घडामोड पहायला मिळत आहेत. यातच माजी मुख्यमंत्री देवेंद्र फडणवीस दिल्लीत पोचले.
हा शिवसेनेचा अंतर्गत मुद्दा : एकनाथ शिंदे यांनी बंडाचा झेंडा हाती घेतल्याने राज्यातील राजकारणारव काय परिणाम होतील याबाबत शरद पवार यांना विचारले असता. एकनाथ शिंदे यांना मुख्यमंत्रीपद नको आहे. त्यासाठी त्यांची नाराजी नसल्याचे यावेळी पवार यांनी स्पष्ट केले. हा शिवसेनेचा अंतर्गत मुद्दा आहे. त्यामुळे आम्ही यासंदर्भात अद्याप काही सांगु शकत नाही. आघाडीनुसार, शिवसेनेकडे मुख्यमंत्रीपद, राष्ट्रवादीकडे उपमुख्यमंत्रीपद व कॉंग्रेसकडे इतर काही महत्त्वाची खाती असल्याचे शरद पवार यांनी स्पष्ट केले आहे.
तीन प्रमुख आमदारांची मध्यस्थी: राज्यातील राजकारण ढवळून निघाले आहे यातच शिवसेना आणि एकनाथ शिंदेंच्या तीन प्रमुख आमदारांनी मध्यस्थीची भूमिका निभावत वर्षावरील बैठकीला उपस्थिती लावली. यात चर्चेसाठी शिवसेनेच्या वतीने मिलिंद नार्वेकर आणि रविंद्र फाटक उपस्थित होते. तर एकनाथ शिंदेच्या वतीने दादा भुसे, संजय राठोड, संतोष बांगर हे आमदार बैठकीला उपस्थित होते. विशेष बाब म्हणजे एकनाथ शिंदेच्या वतीने मध्यस्थी करण्यासाठी गेलेल्या तीन आमदारांनापैकी संजय राठोड यांच्या नावाची पुन्हा चर्चा सुरु झाली आहे.
राज्याला स्थिर सरकारची गरज: विधान परिषदेच्या निकालानंतर राज्यात महाविकास आघाडीत राजकीय भूकंप होईल याची कोणाला शक्यताही वाटली नव्हती. मात्र विधान परिषदेच्या निवडणुकीनंतर एकनाथ शिंदे यांनी काही आमदारांना घेऊन बाहेर पडले. त्यांच्या या राजकीय भूकंपावर विविध स्तरातून प्रतिक्रिया येत आहे. मात्र एकनाथ शिंदे यांचे होम पिच असलेल्या ठाण्यातील नागरिकांनी या संपूर्ण प्रकरणावर संमिश्र प्रतिक्रिया दिली आहे. एकनाथ शिंदेंनी उचललेले पाऊल ठाण्याच्या विकासासाठी योग्य असून शिंदे मुख्यमंत्री झाले तर आम्हाला आनंद होईल, अशी प्रतिक्रिया ठाणेकरांनी दिली आहे. तर दुसरीकडे राज्याला स्थिर सरकार देण्याची गरज असल्याची भावनाही नागरिकांनी बोलून दाखवली आहे.
