भोपाळ - मध्यप्रदेशातील सीधी जिल्ह्यात बस कालव्यात पडून झालेल्या दुर्घटनेत ५० पेक्षा जास्त प्रवाशांचा मृत्यू झाला. यावरुन विरोधी पक्ष काँग्रेसने मुख्यमंत्री शिवराज सिंह चौहान आणि भाजपावर हल्लाबोल केला आहे. दरम्यान, मुख्यमंत्री या दुर्घटनेचा आढावा घेण्यासाठी सीधी जिल्ह्याच्या दौऱ्यावर आले असता शासकीय विश्रामगृहात थांबले होते. मात्र, त्यांना रात्री तेथे मच्छर चावल्याने विश्रामगृहाच्या कर्मचाऱ्याला निलंबित केल्याचा आरोप काँग्रेस नेते जीतू पटवारी यांनी केला आहे.
सीधी जिल्ह्यात एवढी मोठी दुर्घटना घडली. मात्र, अद्याप सरकारने कोणालाही जबाबदार धरले नाही. तसेच योग्य ती कारवाई केली नाही. मात्र, रात्री मुख्यमंत्री शिवराज सिंह चौहान यांना मच्छर चावल्याची घटना सीधीच्या दुर्घटनेपेक्षा मोठी निघाली. सीधी जिल्ह्यातील शासकीय विश्रामगृहाच्या कर्मचाऱ्यालाच निलंबित करण्यात आले, असे जीतू पटवारी म्हणाले. दरम्यान, कर्मचाऱ्याला निलंबित केल्याचे सरकारी पत्र समोर आले आहे. स्वच्छता न राखल्याने अतिथींची गैरसोय झाल्याचे, परिसरात मच्छर झाल्याच्या तक्रारी येत असल्याचे या पत्रात नमूद करण्यात आले आहे.
मुख्यमंत्री सरकार नाही तर सर्कस चालवतायेत -
शिवराज सिंह यांच्या सरकारला एक वर्ष पूर्ण झाले आहे. मात्र, अद्यापही मंत्री, अधिकाऱ्यांच्या नियुक्त्या रखडल्या आहेत. मंत्र्याकडे जर परिवहन विभागाचा कारभार असता तर वाहतूक व्यवस्था एवढी कोलमडलेली नसती. ही दुखद घटना निष्काळजीपणामुळे झाली आहे. त्यामुळे सरकार विरोधात निष्पाप नागरिकांची हत्या केल्याचा गुन्हा दाखल करायला हवा. सीधी दौऱ्यात मुख्यमंत्र्यांना मच्छर चावला तर कर्मचाऱ्याला निलंबित केले. मात्र, एवढ्या मोठ्या घटनेत आत्तापर्यंत काहीही कार्यवाही झाली नाही. शिवराज सिंह चौहान सरकार नाही तर सर्कस चालवत असल्याचे वाटत आहे.
