Indigo Airlines Passenger Mistake: जायचे होते पाटण्याला अन् चढला उदयपूरच्या फ्लाइटमध्ये; 'डीजीसीए'चे चौकशीचे आदेश

इंडिगो एअरलाइन्सच्या कर्मचाऱ्याच्या निष्काळजीपणाचे मोठे प्रकरण आता समोर आले आहे. झाले असे की, एका प्रवाश्याला दिल्लीहून पाटण्याला जायचे होते. पण त्याला त्याच्या नियोजित स्थळापासून तब्बल 1,400 किमी अंतरावर असलेल्या राजस्थानातील उदयपूर येथे उतरविण्यात आले. आता नागरी विमान वाहतूक महासंचालनालयाने (DGCA) या घटनेच्या चौकशीचे आदेश दिले आहेत.

उदयपूर (राजस्थान) : DGCA च्या वरिष्ठ अधिकाऱ्याने दिलेल्या माहितीप्रमाणे, अफसर हुसैन नावाच्या प्रवाशाने पाटण्याला जाण्यासाठी इंडिगो फ्लाइटचे (6E-214) तिकीट बुक केले होते. नियोजित फ्लाइटमध्ये बसण्यासाठी तो 30 जानेवारीला दिल्ली विमानतळावर पोहोचला. परंतु तो चुकून उदयपूरला जाणाऱ्या इंडिगो फ्लाइट (6E-319) मध्ये चढला. काही तासांनी फ्लाइट उदयपूर विमानतळावर पोहोचली. तेथे उतरल्यानंतर त्याला त्याची चूक लक्षात आली. त्यानंतर प्रवाशाने विमानतळावरील अधिकाऱ्यांना याची माहिती दिली. घटनेचे गांभीर्य ओळखून इंडिगोच्या जवानांनी प्रवाशाला त्याच दिवशी दुसऱ्या फ्लाइटने पाटण्याला पाठवले.

एअरलाइन कंपनीचे स्पष्टीकरण : एअरलाइनने या घटनेवर एक निवेदन जारी केले आहे. एका निवेदनात कंपनीने म्हटले आहे की, आम्हाला (6E319) दिल्ली-उदयपूर फ्लाइटमधील प्रवाशासोबत झालेल्या घटनेची माहिती आहे. याबाबत अधिकाऱ्यांशी चर्चा सुरू आहे. प्रवाशांना झालेल्या गैरसोयीबद्दल आम्ही दिलगीर आहोत. त्याचवेळी, डीजीसीएने आता या प्रकरणाची दखल घेत चौकशीचे आदेश दिले आहेत. विमान वाहतूक नियामकाच्या अधिकाऱ्याने सांगितले की, आम्ही या प्रकरणी चौकशी अहवाल मागवित आहोत आणि विमान कंपनीवर योग्य ती कारवाई केली जाईल. तपासात डीजीसीए प्रवाशाचा बोर्डिंग पास व्यवस्थित का स्कॅन केला गेला नाही यामागील कारण शोधले जाईल. डीजीसीएने सांगितले की, बोर्डिंग करण्यापूर्वी बोर्डिंग पास नियमानुसार दोन ठिकाणी तपासला जातो. असे असतानाही प्रवासी चुकीच्या विमानात कसा चढला हा प्रश्न बुचकळ्यात टाकणारा आहे.

इंडिगोच्या विमानात स्पार्क : दिल्लीच्या इंदिरा गांधी विमानतळावरून बेंगळुरूला जाणाऱ्या इंडिगोच्या विमानात ठिणगी पडल्याने 29 ऑक्टोबर, 2022 रोजी आग लागली होती. विमानात एकूण 184 हवाई प्रवासी आणि क्रू मेंबर्स होते. विमानातील सर्व प्रवासी सुरक्षित वाचले. विमानाला आग लागल्याने स्पार्कमुळे विमान दिल्ली विमानतळावरच आपत्कालीन स्थितीत थांबवावे लागले. इंडिगो एअरलाइनने दिलेल्या माहितीनुसार, फ्लाइट क्रमांक 6E-2131 रात्री दिल्लीहून बंगळुरूला निघाले होते. तांत्रिक बिघाडामुळे त्यांना टेक ऑफ दरम्यान दिल्ली विमानतळावर परत थांबावे लागले. यानंतर सर्व हवाई प्रवाशांसाठी पर्यायी विमानाची व्यवस्था करण्यात आली.

इंजिनला स्पार्कमुळे आग : या प्रकरणाची पुष्टी करताना डीसीपी विमानतळ तनु शर्मा यांनी सांगितले की, शुक्रवारी रात्री 10:08 वाजता इंदिरा गांधी आंतरराष्ट्रीय नियंत्रण कक्षाला सीआयएसएफ नियंत्रण कक्षाकडून माहिती मिळाली की फ्लाइट क्रमांक 6 ई-2131 च्या इंजिनला स्पार्कमुळे आग लागली. हे विमान दिल्लीहून बंगळुरूला जात होते. यात एकूण १८४ हवाई प्रवाशांसह ७ क्रू मेंबर्स उपस्थित होते.

हेही वाचा : SBI on Loan to Adani: अदानींचे वासे पोकळ असतील तर एसबीआयला लागणार तब्बल 27 हजार कोटींचा चुना, कसा ते वाचाच...