चंदिगढ : हरियाणाच्या वल्लभगडमध्ये झालेल्या निकिता तोमर हत्या प्रकरणाचा निकाल आज (बुधवार) जाहीर होण्याची शक्यता आहे. २६ ऑक्टोबर २०२०ला दिवसाढवळ्या तौसिफ नावाच्या तरुणाने निकिताची गोळी मारुन हत्या केली होती. याप्रकरणी हरियाणामधील जिल्हा व सत्र न्यायालय आज निकाल जाहीर करेल.
२६ ऑक्टोबरला निकिता परीक्षेनंतर आपल्या घरी जात होती. यावेळी तौसिफ आणि त्याचा मित्र एका गाडीमधून तिथे आले. यावेळी त्यांनी तिला पळवून नेण्याचा प्रयत्न केला. मात्र, तिने विरोध दर्शवत झटापट केल्यानंतर तौसिफने तिला गोळी मारली, आणि तिथून पळून गेला. यातच तिचा मृत्यू झाला. हा सर्व प्रकार सीसीटीव्हीमध्ये कैद झाला होता, ज्यावरुन आरोपींची ओळख पटली आणि पोलिसांनी दोघांना अटक केली.
हे प्रकरण देशभरात गाजले होते. यानंतर हरियाणाच्या विधानसभेत लव्ह जिहाद कायदा लागू करण्यावरुन बराच गदारोळही झाला होता. याप्रकरणी पोलिसांनी ७०० पानांची चार्जशीट दाखल केली होती. तसेच, ११ दिवसांमध्ये हे प्रकरण जलदगती न्यायालयात वर्ग करण्यात आले होते. निकिताचे पालक याप्रकरणी दोषींना फाशीची शिक्षा देण्याची मागणी करत आहेत.
हेही वाचा : एन. व्ही. रमण होणार नवे सरन्यायाधीश; शरद बोबडे यांनी केंद्राकडे केली शिफारस
