वाराणसी (उत्तरप्रदेश): उत्तरप्रदेशात काँग्रेसने भाजपवर जोरदार आरोप केले आहेत. काँग्रेस नेते आणि खासदार राहुल गांधी यांना मंगळवारी प्रयागराज येथील आनंद भवनात आयोजित कार्यक्रमात सहभागी होण्यासाठी जायचे आहे. मात्र, त्याआधीच उत्तर प्रदेशचे राजकारण तापू लागले आहे. राहुल गांधींना सोमवारी रात्री 10.45 च्या सुमारास वाराणसीला पोहोचायचे होते. मात्र, त्यांच्या विमानाला उतरण्याची परवानगी देण्यात आली नसल्याचा आरोप काँग्रेस नेते अजय राय यांनी विमानतळ प्रशासन आणि भाजप हायकमांडवर केला आहे.
काँग्रेसचे नेते झाले नाराज: काँग्रेसचे माजी अध्यक्ष राहुल गांधींना आनंद भवनात आयोजित एका खासगी कार्यक्रमात सहभागी होण्यासाठी मंगळवारी पोहोचायचे आहे. सोमवारी रात्री १०.४५ वाजता ते वायनाडहून वाराणसी विमानतळावर पोहोचणार होते आणि तेथून श्री काशी विश्वनाथ मंदिरात पूजा केल्यानंतर मंगळवारी सकाळी रस्त्याने प्रयागराजला रवाना होणार होते. या नियोजनाच्या अनुषंगाने सायंकाळीच काँग्रेसचे नेते मोठ्या संख्येने विमानतळावर पोहोचले होते, मात्र रात्री साडेनऊच्या सुमारास अचानक काँग्रेस नेत्यांना त्यांचा कार्यक्रम रद्द झाल्याची माहिती देण्यात आली. यानंतर काँग्रेस नेत्यांमध्ये प्रचंड नाराजी दिसून आली.
भाजप सरकार राहुल गांधींना घाबरते: काँग्रेसचे ज्येष्ठ नेते अजय राय यांनी प्रसारमाध्यमांशी बोलताना या संपूर्ण प्रकरणावर भाजप सरकारला फैलावर घेतले. ते म्हणाले की, भाजप सरकार राहुल गांधींना घाबरत आहे. त्यांनी काढलेल्या भारत जोडो यात्रेची भाजपला चिंता आहे. 2024 पूर्वी राहुल गांधी भाजपला अडचणीत आणत आहेत. यामुळे हे सर्व भाजप हायकमांड आणि भाजप सरकारच्या इशाऱ्यावर होत असल्याचा आरोपही त्यांनी केला.
सरकारच्या इशाऱ्यावर कोंडी केल्याचा आरोप: सोमवारी बनारसला पोहोचल्यानंतर राहुल गांधींना प्रयागराजला जायचे होते, असे काँग्रेस नेते अजय राय यांनी म्हटले होते. आम्ही सगळे त्यांच्या स्वागतासाठी पोहोचलो होतो. पण, अचानक विमानतळ प्राधिकरणाने कारण सांगून त्यांच्या विमानाला उतरू दिले नाही. ट्रॅफिक जॅम आहे त्यामुळे त्यांच्या विमानाला उतरण्याची परवानगी देता येणार नाही, असे सांगण्यात आले. हे सर्व सरकारच्या इशाऱ्यावर करण्यात आल्याचा आरोप अजय राय यांनी केला आहे. कारण, भाजपला राहुल गांधींच्या लोकप्रियतेची भीती वाटत आहे, असे ते म्हणाले.
राष्ट्रपतीही होत्या वाराणसी दौऱ्यावर: राहुल गांधींनी भारत जोडो यात्रेचे नेतृत्व केल्यापासून देशाचे पंतप्रधान चिंताग्रस्त आहेत. आता ते राहुलला त्रास देत आहेत, असेही ते पुढे म्हणाले. काँग्रेस खासदार राहुल गांधी हे सोमवारी रात्री वाराणसीत येणार होते आणि आज श्री काशी विश्वनाथ मंदिरात प्रार्थना करणार होते. उल्लेखनीय म्हणजे, वाराणसीतील कोतवाल बाबा कालभैरव मंदिरात प्रार्थना केल्यानंतर सोमवारी संध्याकाळी राष्ट्रपती मुर्मू यांनी श्री काशी विश्वनाथ मंदिराला भेट दिली होती. प्रथमच काशीच्या भेटीदरम्यान, राष्ट्रपतींनी संध्याकाळी दशाश्वमेध घाटावरील भव्य गंगा आरतीलाही हजेरी लावली, असे मुख्यमंत्री कार्यालयाने दिलेल्या म्हटले आहे.
