पीलीभीत - उत्तरप्रदेशच्या पीलीभीत जिल्ह्यात गोतस्करीला विरोध करणाऱ्या युवकाची गोळी घालून हत्या केल्याची घटना समोर आली आहे. ही घटना गुरूवार २२ ऑगस्टला जिल्ह्यातील मोहनपूर बबुरा गावात घडली आहे. सोनपाल असे मृत युवकाचे नाव आहे.
याविषयी सविस्तर माहिती अशी की, मोहनपूर येथील सोनपाल उर्फ सोनू हा जेवण झाल्यानंतर घराबाहेरच्या खाटेवर झोपला होता. यावेळी घराजवळील रस्त्यावर काही लोक गोवंशाच्या जनावरांना एका वाहनात भरत असल्याचे त्याने बघितले. त्यानंतर त्याने गाडी जवळ जाऊन त्या लोकांना गोवंश घऊन जाण्यास विरोध केला. यानंतर चिडलेल्या गोतस्करांनी सोनूवर गोळ्या झाडल्या आणि घटनास्थळावरून पसार झाले.
गोळीबाराचा आवाज ऐकून ग्रामस्थ घटनास्थळी जमा झाले. सोनूला गोळी लागल्याचे त्यांच्या लाक्षात आल्यानंतर त्यांनी स्थानिक पोलिसांनी घटनेची माहिती दिली. त्यानंतर पोलिसांनी सोनूला जिल्हा रुग्णालयात दाखल केले. मात्र, गंभीर जखमी असल्याने त्याला बरेली येथे उपचारासाठी रेफर करण्यात आले. मात्र, बरेलीला नेत असताना वाटेतच त्याचा मृत्यू झाला.
सोनूच्या हत्येनंतर गावात खळबळ उडाली असून या घटनेची माहिती मिळताच पोलीस अधीक्षक मनोज कुमार सोनकर घटनास्थळी दाखल झाले. या प्रकरणी अज्ञात हल्लेखारांविरोधात गुन्हा दाखल करण्यात आला असून पोलीस अधिक तपास करत आहेत.
