श्रीनगर- केंद्र सरकारने फुटीरतावादी नेत्यांवरील कारवाईचा पाश आणखीन आवळण्यास सुरुवात केली आहे. जम्मू आणि काश्मीर लिब्रेशन फ्रंटचा (जेकेएलएफ) अध्यक्ष मोहम्मद यासिन मलिकला मंगळवारी दिल्लीतील तिहार तुरुंगात हलविण्यात आले आहे. तो जम्मूमधील कोट बालवालमध्ये कैदेत होता.
एअर इंडियाच्या विमानाने मलिकला मंगळवारी संध्याकाळी जम्मूहून दिल्लीत आणल्याचे सूत्राने सांगितले. मलिकवर सार्वजनिक सुरक्षितता कायदा (पीएसए) या कायद्यानुसार गुन्हा नोंदविण्यात आलेला आहे. त्याला जम्मूमध्ये ७ मार्चला हलविण्यात आले होते. या कायद्यानुसार कोणत्याही व्यक्तीला कायदेशीर हस्तक्षेपाशिवाय दोन वर्षापर्यंत कैदेत ठेवता येते.
पीडीपीच्या नेत्याला एनआयचे समन्स
राष्ट्रीय तपास संस्थेने ( एनआयए) पीडीपीचा नेता अजाझ मीरला १२ एप्रिलपूर्वी दिल्लीत हजर राहण्याचे समन्स बजावले आहे. शस्त्रास्त्रांची लूट केल्याप्रकरणी राष्ट्रीय तपास संस्थेने हे समन्स बजाविले आहे. गतवर्षी २८ सप्टेंबरला विशेष पोलीस अधिकारी आदिल बशीर शेख हा सात एके-४७ रायफल घेऊन फरार झाला होता. याशिवाय एक पिस्तूल त्याने मीर यांच्या श्रीनगरमधील घरामधून नेले होते. आदिल बशीर शेख हा माजी पोलीस अधिकारी दहशतवादी संघटनेत सहभागी झाल्याचे समोर आले आहे.
