इंदोर - मध्य प्रदेशात सध्या पोट निवडणुकांची रणधुमाळी सुरू आहे. २८ जागांवर होणाऱ्या निवडणुकांसाठी तेथील राजकारण आता तापायला सुरुवात झाली आहे. याच पार्श्वभूमीवर काँग्रेसला सोडचिठ्ठी देऊन भाजपवासी झालेले नेते ज्योतिरादित्य सिंधिया यांनी विरोधकांवर निशाणा साधला आहे. मी आणि मधप्रदेशचे मुख्यमंत्री शिवराज सिंह चौहान यांनी जेव्हापासून हात मिळवणी केली. त्यानंतर आता विरोधी पक्षामध्ये काहीच उरले नसल्याची टीका त्यांनी केली आहे. इंदोरमधील एका सभेला संबोधित करताना सिंधिया यांनी हा निशाणा साधला.
मध्यप्रदेशमध्ये विधानसभेच्या २८ जागांसाठी निवडणुका जाहीर झाल्या आहेत. यासाठी ३ नोव्हेंबरला मतदान पार पडणार असून आता प्रचारसभांच्या तोफा धडाडू लागल्या आहेत. याच प्रकारे इंदोर येथील एका सभेत ज्योतिरादित्य सिंधिया यांनी विरोधकांवर निशाणा साधला आहे. आम्ही एकत्र आल्यानंतर विरोधी पक्षात आता काहीच उरले नाही. काँग्रेस सरकार त्यावेळी फक्त उद्योगांचे स्थलांतर आणि दारू माफियांना प्रोत्साहन देण्याचे काम करत होती, अशी टीका त्यांनी तत्कालीन कमलनाथ सरकारवर केली.
फक्त पैसा कमविण्याचे काम-
सिंधिया पुढे म्हणाले, ही पोटनिवडणूक सत्य आणि असत्य निवडण्याची लढाई आहे. ही निवडणूक विकासाचा मार्ग निवडण्याची आहे. गेल्या काही महिन्यांपासून सांवेर मतदारसंघाचे भाजपचे उमेदवार तुलसी सिलवंत आणि मुख्यमंत्री शिवराज सिंह चौहान हे दोघे मिळून नर्मदा नदीवरून सांवेरमध्ये पिण्याचे पाणी आणण्यासाठी काम करत असल्याचेही सिंधिया यांनी यावेळी सांगितले. तत्कालीन मुख्यमंत्री कमलनाथ यांच्या नेतृत्वातील काँग्रेस सरकार गेल्या १५ महिन्यात फक्त पैसा कमविण्याच्या कामात गुंतली होती. मात्र, मुख्यमंत्री चौहान जनतेच्या सुख-दु:खात जनतेसोबत असल्याचेही ते पुढे म्हणाले.
मध्यप्रेदशात २८ जागांसाठी पोट निवडणुका होणार आहेत. यासाठी ३ नोव्हेंबरला मतदान होणार असून १० नोव्हेंबरला निकाल जाहीर होणार आहे. २८ जागांमध्ये २५ आमदारांनी राजीनामा दिल्याने आणि ३ आमदारांचे निधन झाल्याने या पोटनिवडणुका घेण्यात येत आहेत.
एकूण २३० सदस्य असलेल्या मध्यप्रदेश विधानसभेत सध्या भाजपचे १०७ आमदार, काँग्रसचे ८८, ४ अपक्ष, २ बसपाचे तर एक समाजवादी पक्षाचा आमदार आहे.
