हैदराबाद - दिल्लीतील हिंसाचाराच्या पार्श्वभूमीवर हैदराबादचे पोलीस आयुक्त अंजनी कुमार यांनी ट्वीट करत नागरिकांना सतर्क राहण्याचे तसेच कुठल्याही प्रकारच्या अफवा पसरवू देऊ न,ये असे आवाहन केले आहे. दिल्लीतील घटनेनंतर हैदराबाद शहरात त्या प्रकारची कोणतीही घटना घडू नये यादृष्टीने त्यांनी सतर्कतेचे आवाहन केले आहे.
नागरिकत्व सुधारणा कायद्यावरून गेल्या ३ दिवसांपासून दिल्लीत हिंसाचाराच्या घटना सुरू आहेत. जाळपोळ आणि हिंसाचारात आत्तापर्यंत १७ जणांचा मृत्यू झाला आहे. तर, दिल्लीतील घटनेच्या पार्श्वभूमीवर हैदराबादमध्ये सुरक्षेच्या दृष्टीकोनातून पोलीस आयुक्त अंजनी कुमार यांनी ट्वीट करून नागरिकांना कुठल्याही अफवांवर विश्वास न ठेवता सतर्क राहण्याचे आवाहन केले आहे.
ते ट्वीटमध्ये म्हणाले, हैदराबादच्या सर्व नागरिकांना आवाहन, दिल्लीतील हिंसाचाराच्या घटनांच्या बातम्यांचा फायदा घेऊन कुणीही अफवा पसरवत येथील शांततेला धोक्यात आणण्याचा प्रयत्न करणार नाही याची याची खबरदारी घ्यावी. सर्व नागरिकांनी सावधानतेने आणि एकतेने राहावे.
'आमच्या पेट्रोलिंग गाड्या आणि दुचाकी तुमचा सर्वात जवळचा मित्र आहे. त्यामुळे संयम आणि शांतता बाळगत कोणत्याही अफवा पसरवणाऱ्या बातम्यांवर विश्वास न टाकता एकवटून रहा. आपल्या सुंदर हैदराबादचा अभिमान बाळगा. यासोबतच, संवेदनशील भागात पोलिसांचा बंदोबस्त तैनात करण्यात आल्याचेही त्यांनी ट्वीटरवरून सांगितले.
