बेळगाव - पब्जी खेळताना मध्येच अडवल्यामुळे चिडून एका २१ वर्षीय मुलाने आपल्या वडिलांची हत्या केल्याची धक्कादायक घटना समोर आली आहे. कर्नाटकच्या बेळगाव मध्ये ही घटना घडली आहे. रघुवीर कुंभार असे या तरुणाचे नाव आहे. तर, शंकराप्पा कुंभार असे त्याच्या दुर्दैवी पित्याचे नाव आहे. ते एक निवृत्त पोलीस अधिकारी होते.
मिळालेल्या माहितीनुसार, पब्जी खेळण्यावरून सतत या दोघांमध्ये वाद होत होते. रघुवीरचे वडील कायम त्याला पब्जी खेळण्याच्या सवयीवरून ओरडत. रविवारी रात्रीदेखील दोघांमध्ये असेच भांडण झाले. त्यानंतर, रघुवीरने त्याच्या आईला दुसऱ्या खोलीमध्ये बंद करत, वडिलांची हत्या केली.
निर्घृणपणे केली हत्या..
रघुवीरने आपल्या पित्याची हत्या करत, त्यांचे शिर धडावेगळे केले, तसेच त्यांचा एक पायही कापून बाजूला फेकला. आईने मध्ये पडू नये, म्हणून त्याने आईला दुसऱया खोलीमध्ये बंद करुन ठेवले होते. आपल्याला शांततेत पब्जी खेळता यावी म्हणून खून केल्याचे त्याने सांगितले.
हेही वाचा : धक्कादायक.. पोटच्या दोन चिमुकल्यांची हत्या करून महिलेची आत्महत्या
पोलीस तपासात आढळून आले, की रघुवीरने गावात एक घर भाड्याने घेतले होते, जिथे तो आणि त्याचे मित्र कॉलेजला न जाता टाईमपास करत. त्याचा एक व्हॉट्सअॅप ग्रुपही होता, ज्यामध्ये ते कॉलेजला दांडी मारायचे आणि इतर प्लॅन बनवत.
याआधीही, दिल्लीमधील एका १९ वर्षीय मुलाने पब्जीसाठी आपल्या आई आणि बहिणीची हत्या केल्याची घटना घडली होती. अशा घटनांमुळे, ऑनलाईन गेमिंगच्या कितपत आहारी आजची पिढी जात आहे, आणि गेम्स खेळण्यासाठी हे तरुण कोणत्याही थराला जाऊ शकतात हे लक्षात येते.
हेही वाचा : अबब... घरात चोरी करणारा निघाला पत्नीचा फेसबुक फ्रेंड
