श्रीनगर : जम्मूच्या राजौरी जिल्ह्यात असणाऱ्या नौशेरा भागामध्ये आज दुपारच्या सुमारास सीमेपलीकडून गोळीबार करण्यात आला. नववर्षाच्या पहिल्याच दिवशी पाकिस्तानी सैन्याने शस्त्रसंधीचे उल्लंघन करत गोळीबार आणि ग्रेनेड हल्लेही केले आहेत. यामध्ये भारताच्या एका जवानाला वीरमरण प्राप्त झाले आहे.
"आज दुपारी साडेतीन आणि सायंकाळी साडेपाचच्या सुमारास पाकिस्तानकडून गोळीबार करण्यात आला. याला आपल्या जवानांनीही चोख प्रत्युत्तर दिले. मात्र, आपल्या एका जवानाला यात वीरमरण प्राप्त झाले" अशी माहिती लष्कराच्या एका प्रवक्त्याने दिली.
सायंकाळी साडेपाचच्या सुमारास पाकिस्तानने केलेल्या गोळीबारात नायब सुभेदार रविंदर हे जखमी झाले होते. त्यांना तातडीने उपचारांसाठी नजीकच्या रुग्णालयात दाखल करण्यात आले. मात्र, उपचारांदरम्यान त्यांना वीरमरण प्राप्त झाले, अशी माहिती लष्कराकडून देण्यात आली आहे.
पाच हजारांहून अधिक वेळा शस्त्रसंधीचे उल्लंघन..
जम्मू-काश्मीरमध्ये २०२० साली पाकिस्तानकडून तब्बल ५,१०० वेळा शस्त्रसंधीचे उल्लंघन करण्यात आले. गेल्या १८ वर्षांमधील ही सर्वोच्च संख्या आहे. या आकडेवारीनुसार, वर्षामध्ये दररोज सुमारे १४ वेळा शस्त्रसंधीचे उल्लंघन करण्यात आले.
एकूण 36 लोकांचा मृत्यू, १३० जखमी..
पाकिस्तानकडून करण्यात आलेल्या शस्त्रसंधीमध्ये गेल्या वर्षी एकूण १२ नागरिक आणि २४ जवान हुतात्मा झाले. तसेच, एकूण १३० लोक जखमी झाले होते. यामुळे २००३साली करण्यात आलेल्या शस्त्रसंधीचा उपयोगच काय? असा प्रश्न उपस्थित केला जात आहे.
हेही वाचा : पारिमपोरा चकमकीची निष्पक्ष चौकशी करा - मेहबूबा मुफ्ती
