हैदराबाद - शुक्रवारी दुपारी प्रख्यात गायक- संगीतकार एसपी बालसुब्रमण्यम यांच्या दु:खद निधनाची बातमी आली; आणि यानंतर सर्वच स्तरांमधून हळहळ व्यक्त होऊ लागली. गीतकार बालसुब्रमण्यम यांच्या जाण्याने भारतीय संगीताचे कधीही न भरून येणारे नुकसान झाल्याची भावना त्यांच्या चाहत्यांनी व्यक्त केली.
'रामोजी ग्रुप'चे संचालक रामोजी राव यांनीही दिग्गज गायक बालसुब्रमण्यम यांच्या निधनानंतर शोक व्यक्त करत त्यांना आदरांजली वाहिली. तसेच तेलुगू भाषेत एक व्हिडिओ प्रसिद्ध करत बालसुब्रमण्यम यांच्या आठवणींना उजाळा दिला. एसपी हे फक्त प्रख्यात संगीतकार नसून ते माझे अत्यंत जवळचे साथीदार होते, असे रामोजी राव यांनी म्हटले. त्यांनी भारतीय संगीतात जवळपास पाच दशके 16 विविध भाषांमध्ये गाणी गायली. येणाऱ्या शतकाहून जास्त वेळ त्यांची गाणी चाहत्यांची मनं जिंकत राहतील, असे संचालक म्हणाले.
बालसुब्रमण्यम यांच्यासोबत व्यतीत केलेले क्षण आज डोळ्यात अश्रू दाटून आणतात; आणि तुमच्याबद्दल बोलायला शब्दही कमी पडत असल्याचे रामोजी राव यांनी सांगितले.
पद्मभूषण पुरस्कार विजेते एसपी बालसुब्रमण्यम यांनी शुक्रवारी (25 सप्टेंबर) रोजी वयाच्या 74 व्या वर्षी अखेरचा श्वास घेतला.
