नवी दिल्ली - काही दिवसांतच दिल्लीसह देशभरात टायर असलेल्या ट्रेनमधून प्रवास करायला मिळण्याची शक्यता आहे. येत्या काळात या मेट्रो रेल्वेचा उपक्रम राबवण्यासाठी मोदी सरकारचे शहरी विकास मंत्रालय प्रयत्नात आहे. यासाठी संशोधन करण्यात येत आहे. केंद्रीय शहरी विकास मंत्री हरदीप सिंह पुरी यांनी ही माहिती दिली. अशा मेट्रो पॅरिससह अनेक शहरांमध्ये सुरू आहे.
सर्व शहरे मेट्रो सेवेची मागणी करताहेत
हरदीप सिंह यांनी वाढत्या शहरीकरणामुळे मेट्रो रेल्वेची मागणी वाढत असल्याचे सांगितले. ग्रामीण भागांचे सतत शहरीकरण होत आहे. शहर बनल्यानंतर त्या ठिकाणी मोठ्या प्रमाणात आणि अधिक चांगल्या प्रकारच्या ट्रान्सपोर्टची व्यवस्था आवश्यक असते. दिल्लीमध्ये मेट्रो सुविधा प्रचंड यशस्वी झाली. यानंतर अनेक शहरांमधून मेट्रो रेल्वेची मागणी होऊ लागली. मात्र, सर्व ठिकाणी मेट्रोची सेवा देणे सहजसोपे नाही. मेट्रो महागडी असणे हे याचे मुख्य कारण आहे. यावर उपाय शोधण्यात येत आहे. सूत्रांच्या माहितीनुसार, मेट्रोचे एक किलोमीटर लांबीचे नेटवर्क तयार करण्यासाठी 400 कोटी रुपये इतका प्रचंड खर्च येतो.
हेही वाचा - मध्यप्रदेश : ८० वर्षीय आदिवासी महिलेच्या चित्रांचे इटलीत प्रदर्शन
'मेट्रो ऑन टायर' संबंधी सुरू आहे संशोधन
हरदीप सिंह पुरी म्हणाले की, 2030 पर्यंत जवळजवळ 600 दशलक्ष लोक शहरी क्षेत्रात राहात असतील. तेव्हा त्या ठिकाणी मेट्रोसारख्या स्मार्ट ट्रान्सपोर्टची गरज पडेल. मेट्रोची किंमत जास्त असल्याने सरकार टायरवर चालणारी मेट्रो आणि रूळ याविषयी माहिती घेत आहे. ही जवळपास ३० टक्क्यांनी स्वस्त आहे. ही भारतात कितपत यशस्वी ठरेल, यावर संशोधन होत आहे.
दिल्लीत होणार 500 किलोमीटरचे मेट्रो नेटवर्क
राजधानीमध्ये तिसरी फेज पूर्ण होईपर्यंत मेट्रो नेटवर्क 377 किलोमीटरपर्यंत पोहोचले आहे. चौथी फेज जवळजवळ 104 किलोमीटरची आहे. ती पूर्ण होईल तेव्हा दिल्ली-एनसीआरमध्ये मेट्रोचे नेटवर्क 480 किलोमीटरचे होईल. तसेच, त्यात आरआरटीएसचाही समावेश केला असता, हे नेटवर्क 500 किलोमीटरचे होईल. दिल्लीमध्ये वाहतुकीची समस्या मोठी आहे. मेट्रोमुळे बऱ्याच अंशी सोडवली जाईल.
हेही वाचा - इस्रोकडून चंद्राच्या पृष्ठभागाची छायाचित्रे प्रसिद्ध
