पणजी - विद्यामान खासदार केवळ उद्घाटनाच्या फित कापताना दिसतात. जर खासदार म्हणून निवडून आलो तर प्रत्येक विधानसभा मतदारसंघात दर ३ महिन्यांनी भेट देऊन विकास कामांचा आढावा घेईन, असे 'आप'चे उत्तर गोवा उमेदवार प्रदीप पाडगावकर यांनी सांगितले. त्यांनी आज उत्तर गोवा जिल्हाधिकारी तथा निवडणूक निर्णय अधिकारी यांच्याकडे आपला उमेवारी अर्ज सादर केला.
यावेळी आपचे गोवा संयोजक तथा दक्षिण गोव्याचे उमेदवार एल्वीस गोम्स, वाल्मिकी नाईक आणि अन्य कार्यकर्ते मोठ्यासंख्येने उपस्थित होते. पाडगावकर म्हणाले, खासदार निधीचा वापर हा विकास कामासाठी करून विकासकामे मार्गी लावण्याचा प्रयत्न करणार. तसेच रोजगासाठी धोरण ठरवणार असल्याचे त्यांनी सांगितले. तर, दक्षिण गोव्याचे उमेदवार एल्वीस गोम्स यांनी मंगळवारी उमेदवारी अर्ज दाखल केला.
भाजपकडून सुभाष शिरोडकर यांचा पोटनिवडणुकीसाठी अर्ज
गोवा विधानसभेच्या शिरोडा मतदारसंघात होणाऱ्या पोटनिवडणुकीत भाजपचे उमेदवार म्हणून सुभाष शिरोडकर यांनी आज उमेदवारी अर्ज सादर केला. शिरोडकर यांनी काँग्रेस पक्षाच्या आमदारकीचा राजीनामा देत भाजपमध्ये प्रवेश केला होता. त्यामुळे ही जागा रिक्त झाली होती. २०१७ च्या विधानसभा सार्वत्रिक निवडणुकीत त्यांनी काँग्रेस उमेदवार म्हणून भाजपच्या महादेव नाईक यांचा पराभव केला होता. तर शिरोडकर यांच्या भाजपप्रवेशाने नाराज झालेल्या नाईक यांनी काँग्रेसमध्ये प्रवेश करत उमेदवारी अर्ज दाखल केला.
