लखनऊ - उत्तर प्रदेशातील रायबरेलीमध्ये झालेल्या अपघातामध्ये उन्नाव गैंगरेप मधील पीडिता व वकील गंभीर जखमी झाले आहेत आहे. तर याच प्रकरणातील मुख्य साक्षीदार आणि पीडितेची काकू यांचा मृत्यू झाला आहे. तर पीडितेचे वकीलही या अपघातात जखमी झाले आहेत. जखमींना येथील ट्रामा सेंटरमध्ये उपचारासाठी दाखल करण्यात आहे. या अपघाताची चौकशी करण्यात यावी अशी मागणी काँग्रेसने केली आहे.
मिळालेल्या माहितीनुसार, उन्नाव सामूहिक बलात्कार प्रकरणातील पीडितेचे काका कलम ३०७ अंतर्गत रायबरेली येथील तुरूंगात आहेत. त्यांना भेटायला पीडिता आणि परिवारातील अन्य २ जण जात होते. त्यादरम्यान, त्यांच्या कारने ट्रकला धडक दिली. पाऊस सुरू असताना वेगाने येणाऱया कार आणि ट्रकमध्ये हा अपघात झाला.
रायबरेली मधील एनएच-२३२ वर अटोराजवळ गुरबख्श गंज पोलीस ठाण्याजवळ ही घटना घडल्याचे सांगण्यात येत आहे. अपघातानंतर स्थानिक लोकांनी अपघातग्रस्तांना बाहेर काढले. पोलिसांना माहिती दिल्यानंतर ते घटनास्थळी दाखल झाले. पुढील तपास चालू आहे. तर या प्रकरणाची चौकशी व्हावी, अशी मागणी राज्यातील काँग्रेस पक्षाच्या आमदार आराधना मिश्रा यांनी केली आहे.
या घटनेमध्ये पीडितेची मावशीचा देखील मृत्यू झाल्याची माहिती समोर येत आहे. पीडितेची मृत काकू उन्नावमध्ये झालेल्या सामूहिक बलात्कार प्रकरणातील मुख्य साक्षीदार होती. त्यामुळे ही घटना एक कटकारस्थान असल्याची शक्यता वर्तवली जात आहे.
राज्याचे माजी मुख्यमंत्री अखिलेश यादव यांनी अशोक राज यांचे ट्विट रिट्वीट करत म्हटले आहे की, उन्नाव सामूहिक बलात्कार प्रकरणातील पीडिताच्या अपघात झाला आहे. त्यामध्ये पीडितेच्या काकू यांचा जागीच मृत्यू झाला आहे. तर ती आणि तिचे वकील जखमी झाले आहेत. हे उच्च वर्गीय प्रकरण असून याचा तपास सीबीआय करत आहे. तर अजून अधिक माहिती समोर आली नाही.
