कोरोनाचं संकट गडद; हवेतील द्रवकणांतूनही होतोय फैलाव

आता थेट हवेतूनही कोरोनाची लागण होत असल्याचे चीनमधील स्थानिक वैद्यकीय अधिकाऱ्यांनी सांगितले आहे. त्यामुळे कोरोनाची लागण रोखण्याचे मोठे आव्हान जगासमोर उभे राहिले आहे.

बीजिंग - चीनसह जगभरात दहशत माजवलेल्या कोरोना विषाणूचे संकट आता अधिकच गडद झाल्याचे समोर येत आहे. कोरोना विषाणूची लागण एकमेकांच्या थेट संपर्कातून तसेच स्पर्शाद्वारेही होत असल्याचे आत्तापर्यंत समोर आले होते. मात्र, आता थेट हवेतूनही कोरोनाची लागण होत असल्याचे चीनमधील स्थानिक वैद्यकीय अधिकाऱ्यांनी सांगितले आहे. त्यामुळे कोरोनाची लागण रोखण्याचे मोठे आव्हान जगासमोर उभे राहिले आहे.

हेही वाचा - कोरोनाचे थैमान : मृतांची संख्या ८०० वर, सार्सच्या बळींचा आकडा ओलांडला

हवेमध्ये असलेल्या पाण्याच्या सूक्ष्म कणांतून (सूक्ष्म द्रव बिंदू) या विषाणूची लागण एकाकडून दुसऱ्याला होत आहे. याला 'एरोसोल ट्रान्समिशन' असे म्हटले जाते. विषाणू सूक्ष्म द्रवकणांमध्येही मिसळत असल्याने श्वास घेण्यातूनही याचा फैलाव होऊ लागला आहे. त्यामुळे नागरिकांनी त्यादृष्टीने आपली आणि कुटुंबाची खबरदारी घ्यावी असे, शांघाई सिवील अफेयर्स ब्युरोचे उपमुख्य अधिकारी झेंग क्वॉन यांनी सांगितले.

हेही वाचा - चीनमध्ये कोरोनाचे ७१९ बळी; आरोग्य आणिबाणी हाताळताना चीनची दमछाक

या विषाणूची लागण झालेल्या व्यक्तीच्या खोकण्यातून अथवा शिंकण्यातून शेजारच्या व्यक्तीला त्याची लागण होऊ शकते. स्पर्शातून म्हणजेच कोरोनाची लागण झालेल्या व्यक्तीच्या वस्तूंना दुसऱ्याचा संपर्क आल्यास त्यातून हा विषाणू त्याच्या शरीरात प्रवेश करू शकतो. पण, 'एरोसोल ट्रान्समिशन' हे सर्वात धोकादायक असून त्यामुळे फैलाव अधिक होऊ शकतो.

कोरोनाचा फैलाव रोखण्यासाठी लोकांनी जास्त संख्येन एकत्र येणे टाळावे. हवा खेळती राहण्यासाठी घराच्या खिडक्या, दारे उघडी ठेवावीत, स्वच्छता-साफ सफाईकडे लक्ष द्यावे, स्वयंपाक घर, जेवणाच्या ठिकाणी स्वच्छता ठेवावी, असे आवाहन चीन सरकारकडून लोकांना करण्यात आले आहे.

हेही वाचा - 'आय अ‌ॅम फॉर अल्लेप्पी' : केरळमधील पूरग्रस्तांना रामोजी समुहाने 121 घरे दिली बांधून