नवी दिल्ली - मुनिरका भागात असणाऱ्या एका जुन्या इमारतीला, तब्बल ७२ तासांच्या प्रयत्नांनंतर पाडण्यात आले. दक्षिण एमसीडी अधिकाऱ्यांनी रविवारी सकाळी ही कामगिरी पार पाडली. यानंतर आता, या इमारतीच्या मालकावर डीएमसी कायद्यांतर्गत कारवाई केली जाणार आहे. या इमारतीमध्ये साधारणपणे ६० लोक राहत होते.
गुरुवारी झुकली होती इमारत..
एका अधिकाऱ्याने दिलेल्या माहितीनुसार, गुरुवारी त्यांना ही इमारत खचून झुकल्याची माहिती मिळाली होती. यानंतर खबरदारीचा उपाय म्हणून या आणि शेजारच्या आणखी दोन इमारतीमधील लोकांना बाहेर काढण्यात आले होते. त्यानंतर ही इमारत पाडण्याच्या दृष्टीने तयारी सुरू करण्यात आली होती. अखेर, आज सकाळी ११ च्या सुमारास ही इमारत पाडण्यात आली. ही इमारत पाडताना शेजारील इमारतीचेही नुकसान झाले. या दोनही इमारतींचा मालक एकच आहे.
सहा मजली इमारतीला नाही परवानगी..
अधिकाऱ्यांनी सांगितले, की परिसरात सहा मजली इमारती उभारण्यास परवानगी नाही. मात्र गावामध्ये हा नियम मोडून उभारण्यात आलेल्या कितीतरी इमारती आहेत. याठिकाणी कारवाई करण्यास गेल्यावर तेथील रहिवासी अधिकाऱ्यांना हाकलून लावतात अशी माहितीही त्यांनी दिली.
हेही वाचा : महाराष्ट्रातील भाविकांचा गुजरातमध्ये अपघात; एकाच कुटुंबातील ४ जण ठार
