नवी दिल्ली : एमडीएच मसाल्याचे मालक 'महाशय' धर्मपाल गुलाटी यांचे आज सकाळी हृदयविकाराच्या धक्क्याने निधन झाले. ते ९७ वर्षांचे होते. माता चंदनदेवी रुग्णालयात त्यांनी अखेरचा श्वास घेतला.
गुलाटी यांना सर्व लोक 'दादाजी' आणि 'महाशयजी' नावाने ओळखत असत. १९२३मध्ये पाकिस्तानच्या सियालकोटमध्ये त्यांचा जन्म झाला होता. शाळा सोडल्यानंतर गुलाटी यांनी आपल्या वडिलांच्या मसाल्यांच्या व्यापारात लक्ष घातले. फाळणीनंतर ते सियालकोटमधून भारतात रहायला आले होते. त्यानंतर त्यांनी दिल्लीच्या करोलबागमध्ये आपले मसाल्यांचे दुकान सुरु केले.
या दुकानाच्या जोरावर त्यांनी एमडीएच हा मसाल्यांचा मोठा व्यापार सुरू केला. सध्या देशभरात त्यांचे १५ कारखाने आहेत. २०१९मध्ये त्यांना भारताच्या नागरी पुरस्कारांपैकी एक असलेल्या पद्मभूषण पुरस्काराने सन्मानित करण्यात आले होते.
जगातील सर्वाधिक वयाचे सीईओ..
जगातील सर्वाधिक वयाचे 'सीईओ' म्हणून गुलाटी यांची ओळख होती. त्यांच्याबद्दल इंटरनेटवर मोठ्या प्रमाणात मीम्स बनवले जात होते. नेटीझन्सनी कित्येक वेळा गुलाटी हे 'अमर' असण्याबाबत मीम्स तयार केले होते. मात्र, हे सर्व अर्थातच त्यांच्याप्रती प्रेम आणि आदर राखूनच. ९०च्या दशकात टीव्हीवर आलेल्या 'असली मसाले सच सच, एमडीएच एमडीएच' या जाहीरातीमधून गुलाटी घराघरात पोहोचले. नव्वदच्या दशकात जन्मलेल्या प्रत्येकाला लहानपणापासूनच ही जाहिरात पाठ आहे.
२०२०ने हेही दाखवलं..
२०२०मध्ये कित्येक लोकप्रिय सेलिब्रिटींनी जगाचा निरोप घेतला. हे वर्षच वाईट आहे असे मत जवळपास सर्वच लोक व्यक्त करत आहेत. त्यातच आता गुलाटी यांच्या जाण्याने, '२०२०ने हेही दाखवलं' अशा आशयाच्या प्रतिक्रिया नेटिझन्स व्यक्त करत आहेत.
हेही वाचा : जंगली हत्तीने माणसाला पायदळी तुडवले!...पाहा व्हिडिओ
