पणजी - कुंभारजुवेचे आमदार पांडुरंग मडकईकर यांना वर्षभरापूर्वी पक्षाघाताचा झटका आला होता. त्यामुळे ते काहीच हालचाल करत नव्हते. मात्र, अलिकडे सभागृहात उपस्थित राहत कामकाजात सहभाग घेत आहेत. सत्ताधारी भाजपचे आमदार असूनही जुने गोवे परिसरातील बायंगिणी येथे होणाऱ्या कचरा प्रकल्पाच्या उभारणीला त्यांनी विरोध केला आहे. त्यामुळे वर्षभरानंतर सभागृहात त्यांचा आवाज घुमला.
गोवा विधानसभेत पावसाळी अधिवेशन सुरु आहे. त्यामध्ये शनिवारी मडकईकर यांनी बायंगिणी कचरा प्रकल्पासंदर्भात 'लक्ष्यवेधी' प्रश्न मांडला होता. मात्र, त्यांच्यावतीने मांद्रेचे आमदार दयानंद सोपटे यांनी त्याचे वाचन केले. त्यांनंतर त्यावर चर्चा झाली. त्यामध्ये ते सहभागी झाले नव्हते. मात्र, त्यानंतर मांडण्यात आलेल्या आणि विज्ञान आणि तंत्रज्ञान खात्याशी संबंधित खासगी ठरावाच्या निमित्ताने झालेल्या चर्चेत ते सहभागी झाले.
कचरा प्रकल्पाची गोव्याला गरज आहे. परंतु, त्यासाठी बायंगिणी- जुने गोवे येथील निवडलेली जागा ही चुकीची आहे. माझा प्रकल्पाला विरोध नाही. मात्र जी जाडा निवडली आहे त्यापासून काही अंतरावर ऐतिहासिक वास्तू असल्याने येथे विदेशी पर्यटक मोठ्या संख्येने येतात. तसेच शाळा आणि मंदिर परिसर आहे, असे मत मडकईकर यांनी सभागृहात मांडले.
या प्रकल्पाला सुरुवातीपासून माझा विरोध आहे. हा प्रकल्प तेथे नको. लक्ष्यवेधीच्या चर्चेत मंत्र्यांनी याला माझा पाठिंबा आहे, असे सांगितले असले तरी मी पूर्ण या विरोधात आहे. अन्य एखाद्या आमदाराने हा प्रकल्प आपल्या मतदारसंघात नेण्यास माझी काहीच हरकत नाही, असेही ते म्हणाले.
आजारपणामुळे विधानसभेत येऊ न शकलेले आमदार मडकईकर सभापती निवडीसाठी पहिल्यांदा सहायकाच्या मदतीने सभागृहात पोहोचले होते. त्यानंतर आता ते पावसाळी अधिवेशनात सहभागी झाले आहेत.
