नवी दिल्ली : केंद्रीय शिक्षण मंत्री रमेश पोखरियाल यांनी आज जेईई अ‌ॅडव्हान्स्ड परीक्षेची तारीख जाहीर केली. ३ जुलै २०२१ला ही परीक्षा होणार असल्याचे पोखरियाल यांनी स्पष्ट केले. परीक्षेच्या तयारीसाठी आता पुरेसा वेळ आहे, त्यामुळे विद्यार्थ्यांनी अभ्यास सुरू करावा असेही त्यांनी सांगितले.
७५ टक्केंची अट हटवली..
पोखरियाल यांनी सांगितले, की कोरोनाची पार्श्वभूमी लक्षात घेता आयआयटीमध्ये प्रवेशासाठीची ७५ टक्के गुणांची अट हटवण्यात आली आहे. प्रतिभावान विद्यार्थ्यांनाही समान संधी मिळावी यासाठी हा निर्णय घेण्यात आला असल्याचे त्यांनी स्पष्ट केले. तसेच, आयआयटी खड़गपूर या परीक्षेचे आयोजन करणार असल्याचेही पोखरियाल यांनी सांगितले.
जेईई-मेन्स होणार चार वेळा; पहिली फेरी फेब्रुवारीमध्ये..
यापूर्वी पोखरियाल यांनी सांगितले होते, की २०२१मध्ये विद्यार्थ्यांच्या सोयीसाठी जेईई-मेन्स ही परीक्षा चार वेळा घेण्यात येणार आहे. विद्यार्थ्यांना परीक्षा देणे अधिकाधिक सोपे व्हावे, आणि आपला स्कोर वाढवण्याच्या अधिक संधी मिळाव्यात यासाठी हा निर्णय घेतल्याचे त्यांनी स्पष्ट केले होते. जेईई मेन्सची पहिली फेरी ही २३ ते २६ फेब्रुवारीपर्यंत घेण्यात येणार आहे. तसेच मार्च, एप्रिल आणि मेमध्ये पुढील फेऱ्या होणार आहेत.
हेही वाचा : आयआयटी आंदोलन : गोव्यात पोलीस आणि आंदोलकांमध्ये लाठीचार्ज दगडफेकीचे प्रकार
