चेन्नई - विल्लीपुरम जिल्ह्यातील सलामतनगर येथे एकाच कुटुंबातील पाच लोकांनी विष घेऊन आत्महत्या केल्याची धक्कादायक घटना घडली. मृतांमध्ये पती-पत्नी आणि तीन मुलांचा समावेश आहे. अरूण(33), शिवगामी(27), प्रियदर्शीनी(4), भारती(30) आणि शिवश्री(1) अशी मृतांची नावे आहेत.
अरूणने आपल्या तीन अपत्यांना आणि पत्नीला विष दिले, त्यानंतर स्वत:ही घेतले. कर्जबाजारीपणातून त्याने हे पाऊल उचलले. मृत्यूपुर्वी त्याने मोबाईल फोनमध्ये एक व्हिडिओ चित्रीत करून ठेवला आहे. अरूण एका सोनाराच्या दुकानात काम करत असल्याची प्राथमिक माहिती समोर आली आहे.
त्याला लॉटरी तिकिटे खरेदी करण्याची सवय होती. त्याच्याकडे काही बेकायदेशीर लॉटरी तिकिटेही पोलिसांना मिळाली आहेत. लॉटरीच्या व्यसनामुळे तो कर्जबाजारी झाला, अशी माहिती पोलिसांनी दिली.
'मी माझ्या मुलांना आणि पत्नीला विष दिले आहे. माझ्या डोळ्यासमोर माझी मुलं तडफडून जीव सोडत आहेत. राज्यात लॉटरी बंद करण्यात यावी, ही माझी विनंती आहे. त्यामुळे पुन्हा माझ्या सारखी परिस्थिती कुणावर येणार नाही,' असे अरूणने मृत्यूपुर्वी काढलेल्या व्हिडिओमध्ये म्हटले आहे.
