नई दिल्ली/ग्रेटर नोएडा - राजधानी दिल्लीत एका परिवाराने आपल्याच मुलीची गोळी घालून हत्या केल्याची धक्कादायक घटना समोर आली आहे. मृत मुलीचे नाव निशा असे आहे. तिने केलेल्या प्रेमविवाहाने तिचे घरचे नाखुश होते. याच कारणातून तिची हत्या करण्यात आल्याचा आरोप निशाचा पती सुनीलने केला आहे. सुनीलने याप्रकरणी निशाच्या घरातील ८ लोकांविरुद्ध जेवर पोलीस ठाण्यात तक्रार नोंदविली आहे.
सुनिलने सांगितल्याप्रमाणे, या दोघांनी १८ जून २०१८ रोजी कोर्टात लग्न केले होते. कायद्यानुसार ते दोघेही लग्नास पात्र होते. सुनीलच्या घरच्यांनी निशाला स्वीकारलंही. मात्र, त्या दोघांच्या लग्नाने निशाचे वडील देवीरण, भाऊ संदीप, सुशील आणि काका सत्य प्रकाश हे नाखूश होते. लग्नानंतर निशा अधूनमधून माहेरी राहायला जात असे. मागिल एक महिन्यापासून निशा ही तिच्या माहेरीच होती. तिच्या घरचे रोज या ना त्या कारणावरून तिला त्रास द्याचये, मारायचे, जिवे मारण्याची धमकी द्यायचे.
निशाच्या गावी दस्तमपूरमध्ये शेजारी राहणाऱ्या मुलीच्या लग्नाची तयारी सुरू होती. नेहमीप्रमाणे गुरुवारीही निशा तिची आई ऊषाबरोबर शेजारच्या घरी गेली. निशाच्या गावातील काका रतनपाल, त्याची पत्नी पुष्पा, काका सत्तू व त्याची पत्नी सरोज यांना याबाबत माहिती होती. त्याच रात्री निशाची हत्या करण्याचा डाव भाऊ संदीप, सुशील, काका राजेश, सत्तू उर्फ सत्यप्रकाश, भाऊजी ऋषि, आणि आई उषा देवी यांनी त्यांच्या घरामागे राहणाऱ्या राजेश नामक व्यक्तीच्या घरी रचला. या योजनेनुसार गुरुवारी रात्री १२ वाजता निशा तिच्या घरावरील छतावर एकटी असताना, तिच्या घरातील ऋषि, संदीप, सुशील, राजेश, आई उषा आणि काकू पुष्पा यांनी तिची गोळी झाडून हत्या केली.
गोळीचा आवाज ऐकताच कुलदीपचा मुलगा कुंवरपाल व गावातील इतर लोकांनी घटनास्थळाकडे धाव घेतली. गावातील लोकांनी आरोपिंना पळताना बघितले व पोलीस ठाण्याला फोन करून याबाबत कळवले. पोलिसांनी दिलेल्या माहितीनुसार निशाची गोळी मारून हत्या करण्यात आली आहे. घटनेचा एफआयआर नोंदविण्यात आला असून लवकरच आरोपिंना अटक करण्यात येईल, असे पोलिसांनी सांगितले.
निशाच्या मृत्यूनंतर सुनील घाबरला आहे. वारंवार जीवे मारण्याच्या धमक्या येत असून त्याच्या जीवालाही धोका असल्याचे सुनीलने सांगितले. त्यामूळे लवकरात लवकर आरोपींना अटक करण्यात यावी आणि आरोपींना अटक होईपर्यंत सुरक्षा देण्यात यावी, अशी मागणीही सुनीलने केली आहे.
