नवी दिल्ली - पश्चिम बंगालमध्ये सुरू असलेल्या डॉक्टरांच्या संपाची धग आता संपूर्ण देशात पोहोचली आहे. आज दिल्लीसह महाराष्ट्र आणि इतर राज्यांतील डॉक्टरांनी या आंदोलनात उडी घेतली असून रुग्णसेवा बंद केली आहे. त्यामुळे रुग्णांचे प्रचंड हाल होत आहेत.
बंगालमधील एका डॉक्टरला मारहाण केल्याप्रकरणी मेडिकल असोशिएशनने रोष व्यक्त केला. या घटनेने आता राजकीय वळण घेतले आहे. मागील ४ दिवसांपासून सुरू असलेल्या डॉक्टरांच्या संपाला ममतांनी प्रतिसाद दिला नाही. त्यांनी डॉक्टरांना तत्काळ संप मागे घेऊन कामावर रूजू होण्याचे आदेश दिले आहेत. मात्र, ममतांच्या या पवित्र्यामुळे प्रकरण आणखीच चिघळले असून देशातील इतर राज्यांतील डॉक्टरांनीही या संपात सहभाग घेतला आहे.
बंगालमधील डॉक्टरांच्या समर्थनार्थ दिल्लीतील एम्स रुग्णालयाच्या रेसिडेंट डॉक्टर असोसिएशन (आरडीए)ने आजपासूनच संप सुरू केला आहे. त्याचबरोबर महाराष्ट्रातील मुंबई, नागपूर येथील डॉक्टरांनीही काम बंद ठेवण्याच निर्णय घेतला आहे. तसेच हैदराबादच्या निजाम इन्सिट्युट ऑफ मेडिकल सायन्स या संस्थेच्या डॉक्टरांनी संप करत निदर्शने केली.
डॉक्टरांच्या या संपाचे लोण देशभर पसरले असून आज मुंबई, हैदराबाद, पंजाब, केरळ, राजस्थान, बिहार, मध्य प्रदेश येथील डॉक्टरही संपावर गेले आहेत. त्यामुळे देशातील रुग्णसेवा विस्कळीत झाली असून रुग्णांना मोठा फटका बसत आहे.
