हैदराबाद - रशियन बनावटीच्या स्पुटनिक -५ या कोरोना लसीच्या दुसऱ्या आणि तिसऱ्या टप्प्यातील क्लिनिकल चाचण्या घेण्यास भारताच्या औषध महानियंत्रक कार्यालयाने (डीसीजीआय) डॉ. रेड्डी लॅब औषधनिर्मिती कंपनीला नुकतीच परवानगी दिली आहे. मात्र, त्यानंतर काही दिवसांतच कंपनीवर 'सायबर' हल्ला झाल्याची माहिती समोर आली आहे. कंपनीच्या संगणकीय माहितीवर सायबर हल्ला होत असल्याचे दिसले, असे कंपनीने म्हटले आहे.
प्रतिबंधात्मक उपाय म्हणून कंपनीने ऑनलाइन कामकाज थांबविले आहे. विविध माहिती केंद्रांना देण्यात येणाऱ्या सुविधा कंपनीने सुरक्षेचा उपाय म्हणून थांबविल्या आहेत. या सायबर हल्ल्यामुळे कंपनीच्या कोविड लसीच्या चाचण्यास खीळ बसण्याची शक्यता वर्तविली जात आहे.
सायबर हल्ल्यानंतर कंपनीचे मुख्य माहिती अधिकारी मुकेश राठी यांनी प्रतिक्रिया दिली आहे. येत्या २४ तासांत आम्ही सर्व सेवा सुरळीत करण्याच्या दृष्टीने प्रयत्न करत आहोत. या हल्ल्यामुळे आमच्या कामकाजावर जास्त काही प्रभाव पडला नसल्याचे राठी म्हणाले. कंपनीच्या माहितीवर कोणी हल्ला केला याची माहिती कंपनीने उघड केली नाही.
भारतातील स्पुटनिक-५ च्या चाचण्या डॉ. रेड्डी लॅबकडून
कोरोना लसीचे उत्पादन करुन चाचण्या घेण्यासाठी रशियाने आणि डॉ. रेड्डी फार्मास्युटिक कंपनीशी १६ सप्टेंबरला सहकार्य करार केला आहे. 'ही खूप महत्त्वाची घडामोड असून त्यामुळे भारतात आता क्लिनिकल चाचण्या घेता येणार आहेत. कोरोनाचा प्रसार रोखण्याासाठी सुरक्षित आणि कार्यक्षम लस आणण्यासाठी आम्ही कटीबद्ध आहोत', असे डॉ. रेड्डी कंपनीचे सह-संचालक आणि व्यवस्थापकीय संचालक जी. व्ही. प्रसाद म्हणाले होते.
सर्व परवाने मिळाल्याने देशात आता लसीच्या चाचण्या सुरू करता येतील. स्पुटनिक लस ही कोरोनाचा प्रसार थांबविण्यासाठी सुरक्षित आढळून आली असल्याचे प्रसाद यांनी सांगितले होते. स्पुटनिक लसीचे व्यवस्थापन 'रशियन डायरेक्ट इन्व्हेस्टमेंट फंड' ही संस्था पाहत असून २०२० वर्षाच्या शेवटी लसीचा पुरवठा भारताला होऊ शकतो, असे संस्थेने म्हटले आहे. मात्र, त्याआधी यशस्वी चाचण्या आणि सर्व नियम अटींची पूर्तता होणे अनिवार्य असल्याचे रशियाने स्पष्ट केले आहे.
