अहमदाबाद (गुजरात) - आज पहाटे शहरात एक तीनमजली व्यावसायिक संकुल कोसळले. या घटनेत एका व्यक्तीचा जागीच मृत्यू झाला. तर, दोघांना वाचवण्यात आले आहे. कुबेरनगर भागात ही घटना घडली.
प्रेम काम्प्लेक्स या व्यावसायिक संकुलाची इमारत जुनी झाली होती. या संकुलात जवळपास १० दुकाने होती. मध्यरात्री १ वाजताच्या सुमारास हे संकुल कोसळल्याचे अग्निशमन दलाचे अधिकारी जयेश खाडीया यांनी सांगितले. घटनेची माहिती मिळताच आम्ही टीमसह घटनास्थळी पोहोचलो आणि बचावकार्याला सुरुवात केली. जवळपास सहा तासांनी हे बचावकार्य थांबले.
इमारतीच्या मलब्यातून दोघांना जिवंत बाहेर काढण्यात आले. तर तिसऱ्या व्यक्तीचा मृत्यू झाला असून त्याचा मृतदेह सापडल्याची माहिती, खाडीया यांनी दिली.
