बंगळुरू (कर्नाटक) - सोशल मीडियावर खोटे मेसेज, अफवा, आक्षेपार्ह तसेच तणाव निर्माण होईल, अशा पोस्ट टाकणाऱ्यांवर कारवाई करण्यात येईल, असे बंगळुरूच्या एका वरीष्ठ पोलीस अधिकाऱ्यांने सांगितले. समाजात तेढ निर्माण करणारे मेसेज करण्यात काहीच अर्थ नाही. अशा लोकांवर आम्ही लक्ष ठेवून आहोत. या सर्वांवर कारवाई करणार असल्याचे बंगळुरूचे पोलीस आयुक्त भास्कर राव यांनी पत्रकार परिषदेत सांगितले.
राव यांनी पुढे सांगितले, की पोलीस विभाग खोट्या मेसेजेसवर बारीक लक्ष ठेऊन आहेत. लॉकडाऊननंतर या सर्वांवर कारवाई करणार असल्याची माहिती दिली. एका समुदायाला लक्ष्य करून असे मेसेज पसरवणाऱ्यांना नोटीस देण्यात आल्याचेही त्यांनी सांगितले. समाजात तेढ आणि द्वेष निर्माण करण्याऐवजी या जागतिक महामारीचा मिळून सामना करण्याचे आवाहन त्यांनी केले. चांगले नागरिक बना आणि समाजात नकारत्मकता न पसरवण्याची विनंती त्यांनी केली.
शहरात अनेक लोक लॉकडाऊनचे उल्लंघन करत असल्याचेही राव यांनी सांगितले. तसेच पोलिसांनी पकडल्यानंतर प्रतिष्ठीत लोकांची नावे सांगून सुटण्याचा प्रयत्न करत असल्याचे त्यांनी नमुद केले. ही वेळ ही कामे करण्याची नसल्याचेही त्यांनी सांगितले.
शहरात भाड्याने राहणाऱ्या लोकांना घरमालक अन्न पुरवत नसल्याचे तसेच इलेक्ट्रिसीटी कनेक्शन कापल्याच्या तक्रारी येत असल्याचे राव यांनी सांगितले. लॉकडाऊन संपल्यानंतर तुमच्यावर अत्यंत कठोर कारवाई केली जाईल. भाडेकरुंना त्रास देण्याचा प्रयत्न केल्यास तुम्हाला तुरूंगातही टाकले जाईल,’ असे राव यांनी घरमालकांना बजावले.
शिक्षण आणि रोजगाराचे माहेरघर म्हणून बंगळुरू शहर दूरदूरच्या हजारो विद्यार्थी आणि कामगारांना आकर्षित करते. त्यामुळे त्यांची काळजी घेणे, ही आपली जबाबदारी असल्याचे राव यांनी सांगितले.
