नवी दिल्ली - नोएडामध्ये ऑटो रिक्षाला अज्ञात वाहनाने धडक दिल्यानंतर ऑटो नाल्यामध्ये जाऊन पडला. ऑटो नाल्यात पडल्यानंतर सर्व प्रवासी गाळामध्ये अडकले होते. मात्र, ऑटोमधील आठही प्रवाशांना वाचवण्यात यश आले आहे. ऑटो लेबर चौकातून मामूराकडे जात असताना हा अपघात झाला.
अज्ञात वाहनाने टक्कर दिल्यानंतर ऑटो नाल्यात पडला होता. त्यामुळे आसपासच्या लोकांनी तत्काळ नाल्याकडे धाव घेतली. ऑटोमध्ये एकून ८ प्रवासी होते. नाल्यामध्ये गाळ असल्याने प्रवासी गाळात खोलवर अडकल्याची भीती व्यक्त केली जात होती. पोलीस घटनास्थळी दाखल झाल्यानंतर बचावकार्य हाती घेण्यात आले. क्रेनने ऑटो नाल्यातून बाहेर काढण्यात आला.
गाळामध्ये कोणी अडकले आहे का? याचाही शोध घेण्यात आला. ही अत्यंत गंभीर अपघात होता, असे पोलिसांनी सांगितले. ज्या अज्ञात वाहनाने ऑटोला धडक दिली त्याचा पोलीस शोध घेत आहेत.
