अलिगड (उत्तर प्रदेश) - हाथरसच्या बलात्कार प्रकरणावरून देशभरात संतापाची लाट असताना आता याच गावातील आणखी एका ६ वर्षीय चिमुकलीचा बलात्कारामुळे मृत्यू झाल्याची दुर्दैवी घटना समोर आली आहे. अलीगडच्या इगलासमध्ये राहणाऱ्या मावस भावाने तिच्यावर बलात्कार केला होता. उपचारासाठी तिला दिल्लीमध्ये दाखल करण्यात आले होते. मात्र, दिल्लीतील एका रुग्णालयात तिचा आज (मंगळवार) मृत्यू झाला.
ही मुलगी मूळची हाथरस या गावची आहे. मात्र, गेल्या वर्षी आईचे निधन झाल्यामुळे ती तिच्या मावशीकडे राहण्यास गेली होती. काही दिवसांपूर्वी तिच्या मावस भावाने तिच्यावर अत्याचार केले. त्यानंतर तिची प्रकृती बिघडत गेल्याने तिला दिल्लीतील एका रुग्णालयात उपचारासाठी दाखल करण्यात आले होते. मात्र, आज तिचा मृत्यू झाला.
हेही वाचा - हाथरस प्रकरण : मंत्री रामदास आठवले यांनी घेतली पीडित कुटुंबीयांची भेट
या प्रकरणातही गुन्हा दाखल करून घेण्यास पोलिसांनी टाळाटाळ केल्याचे दिसून आले आहे. त्यामुळे अलीगडचे पोलीस अधीक्षक जी. मुनीराज यांनी संबंधित पोलीस ठाणे अधिकाऱ्याला निलंबित केले आहे. या प्रकरणात पोलिसांनी तक्रार दाखल करून घेतली नसल्याने संबंधित अधिकाऱ्यांना अटक करावी, अशी मागणी बालिकेच्या नातेवाईकांनी केली आहे.
नातेवाईकांनी पीडितेचा मृतदेह सादाबाद-बलदेव रस्त्यावर ठेवून आरोपी आणि दोषी पोलीस अधिकाऱ्यांना अटक करण्याची मागणी लावून धरली. नातेवाईकांना शांत करण्यासाठी तेथे आता मोठा पोलीस बंदोबस्त तैनात करण्यात आला असून वरिष्ठ अधिकारीही दाखल झाल्याचे सांगण्यात येत आहे.
हेही वाचा - हाथरस पीडितेची ओळख उघड केल्याबद्दल मालवीय, सिंह, स्वराला NCW कडून नोटीस
