नवी दिल्ली - केंद्रीय गृहमंत्री अमित शाह आज (सोमवार) जम्मू-काश्मीर आरक्षण संशोधन विधेयक सादर करणार आहेत. जम्मू-काश्मीरमधील आर्थिकदृष्ट्या दुर्बल घटकांसाठी दिलेल्या १० टक्के आरक्षणासंदर्भात काढलेल्या अध्यादेशाच्या ठिकाणी हे विधेयक जागा घेणार आहे.
संसदेतील दोन्ही सभागृह लोकसभा आणि राज्यसभेत राष्ट्रपती रामनाथ कोविंद यांच्या अभिभाषण प्रस्तावावर चर्चा केली जाणार आहे. यानंतर, अमित शाह जम्मू-काश्मीर संदर्भातील आरक्षण विधेयक संसदेत सादर करणार आहेत. याआधी फेब्रुवारी महिन्यात जम्मू-काश्मीर आरक्षण विधेयकाला राष्ट्रपतींकडून मंजुरी मिळालेली आहे. हे विधेयक मंजुर झाल्यानंतर काश्मीरच्या सीमावर्ती भागात राहणाऱ्या नागरिकांना याचा लाभ होणार आहे.
