नवी दिल्ली - कोरोनाबाबत काहीशी दिलासादायक बातमी आली आहे. देशात गेल्या चोवीस तासात ५७ हजार ३८१ रुग्णांनी कोरोनावर मात केली आहे. सध्या देशातील कोरोना रुग्ण बरे होण्याचा दर हा ७० टक्क्यांपेक्षा जास्त आहे. हा आतापर्यंतचा उच्चांकी आकडा असल्याची माहिती केंद्रीय आरोग्य मंत्रालयाने दिली.
३२ राज्ये आणि केंद्रशासित प्रदेशांचा रुग्ण बरे होण्याचा दर हा ५० टक्क्यांपेक्षा जास्त आहे. यातील १२ राज्यांचा दर तर देशाच्या दरापेक्षाही जास्त आहे. आतापर्यंत एकूण १८ लाख ८ हजार ९३६ कोरोनाबाधित बरे झाले आहेत. अ‌ॅक्टिव्ह बाधित रुग्ण आणि बरे झालेले रुग्ण यादरम्यान असलेले अंतर वाढले आहे (११ लाख ४० हजार ७१६), असे आरोग्य मंत्रालयाने सांगितले.
सध्या देशात ६ लाख ६८ हजार २२० अ‌ॅक्टिव्ह रुग्ण असून सर्वांवर उपचार सुरू आहेत. गेल्या २४ तासात ८ लाख ६८ हजार ६७९ जणांची कोरोना चाचणी करण्यात आली असून आतापर्यंत देशात एकूण २ कोटी ८५ लाख कोरोना चाचण्या झाल्या आहेत. देशाचा मृत्यूदर हा जागतिक मृत्यूदरापेक्षा कमी असून ही आशादायक बाब असल्याचे आरोग्य मंत्रालयाने म्हटले आहे.
देशात कोरोना चाचण्या करणाऱया प्रयोगशाळांच्या संख्येत सातत्याने वाढ करण्याचा प्रयत्न सुरू आहे. सध्या देशभरात १ हजार ४६५ कोरोना चाचणी प्रयोगशाळा असून यातील ९८६ सरकारी मालकीच्या आहेत तर ४९७ या खासगी मालकीच्या आहेत.
