नवी दिल्ली - रोजंदारीवर आणि कृषी क्षेत्रात काम करणाऱ्या सुमारे ४३ हजार मजुरांनी २०१९ या वर्षात आत्महत्या करुन जीवन संपविल्याची माहिती 'नॅशनल क्राईम रेकॉर्ड ब्युरो'च्या अहवालात समोर आली आहे. २०१९ या वर्षातील एकूण आत्महत्येपैकी रोजंदारीवर काम करणाऱ्या ३२ हजार ५६३ मजूरांनी आत्महत्या केली. एकूण आत्महत्यांचा विचार करता ही टक्केवारी २३.४ टक्के आहे. २०१८ साली ही आकडेवारी ३० हजार १३२ होती. २०१९ या वर्षात देशभरात १ लाख ३९ हजार १२३ नागरिकांनी आत्महत्या केल्या आहेत.
कृषी क्षेत्रात काम करणाऱ्या १० हजार २८१ कामगारांनी २०१९ सालात आत्महत्या केली. (५ हजार ९५७ शेतकरी आणि ४ हजार ३२४ शेतमजूर). एकूण आत्महत्येपैकी कृषी क्षेत्रातील टक्केवारी ७.४ आहे. २०१९ साली शेतकऱ्यांनी केलेल्या आत्महत्यांपैकी ५ हजार ५६३ पुरुष आणि ३९४ महिला आहेत. शेतमजूरांपैकी ३ हजार ७४९ तर ५७५ महिलांनी आत्महत्या केली.
महाराष्ट्रात सर्वात जास्त शेतकऱ्यांच्या आत्महत्या
कृषी क्षेत्रातील एकूण आत्महत्येंपैकी सर्वात जास्त आत्महत्या या महाराष्ट्रात (३८.२) झाल्या आहेत. त्या खालोखाल कर्नाटक राज्यात १९.४ टक्के शेतकऱ्यांनी आत्महत्या केली आहे. आंध्रप्रदेश १० टक्के, मध्य प्रदेश ५.३ टक्के, छत्तीसगड आणि तेलंगाणा तर ४.९ टक्के शेतकऱ्यांनी आत्महत्या केली आहे.
२०१९ वर्षी देशभरात १ लाख ३९ हजार १२३ नागरिकांनी आत्महत्या केली. २०१८ साली ही आकडेवारी १ लाख ३४ हजार ५१६ होती. त्यामुळे एका वर्षात देशात आत्महत्या वाढल्याचे दिसून येत आहे. एकूण आत्महत्यांचा विचार करता रोजंदारीवर काम करणाऱ्या सर्वात जास्त नागरिकांनी आत्महत्या केली आहे.
एकूण आत्महत्येपैकी स्वत:चा व्यवसाय करणाऱ्या ११.६ टक्के त्याखालोखाल १०.१ टक्के बेरोजगार, नोकरी करणाऱ्या ९.१ टक्के लोकांनी आत्महत्या केली. तर ७.४ विद्यार्थ्यांनी जीवन संपविले. निवृत्ती झालेल्या ०.९ टक्के लोकांची संख्या आहे.
