प्रयागराज (उत्तर प्रदेश) : अतिक अहमद आणि अशरफ यांची गोळ्या झाडून हत्या करणारे तीन शूटर्स अरुण मौर्य, सनी सिंग आणि लवलेश तिवारी यांना आज प्रयागराज न्यायालयात हजर करण्यात आले. न्यायालयाने या तिघांना 14 दिवसांची न्यायालयीन कोठडी सुनावली आहे. दोन शटर्सना पोलीस व्हॅनमधून न्यायालयात आणण्यात आले, तर एकाला रुग्णवाहिकेतून आणण्यात आले. पोलिसांनी न्यायालयाबाहेरच माध्यमांना रोखले. या तिघांवरही न्यायालयात खटला चालू आहे.
तिघांची रात्री उशिरापर्यंत चौकशी : काल रात्री उशिरा प्रयागराजच्या कॅल्विन हॉस्पिटलमध्ये मेडिकलसाठी आणलेल्या माफिया अतिक अहमद आणि त्याचा भाऊ अशरफ यांची या तीन तरुणांनी गोळ्या झाडून हत्या केली. खून केल्यानंतर तिघांनीही पोलिसांसमोर शरणागती पत्कारली. पोलिसांनी या तीन तरुणांना ताब्यात घेऊन चौकशीसाठी नेले. चौकशीत त्यांची नावे लवलेश तिवारी, सनी सिंग आणि अरुण मौर्य असे असल्याचे समोर आले. या तिघांनीही आपल्याला डॉन व्हायचे होते, म्हणून ही घटना घडवून आणल्याची कबुली दिली आहे. पोलीस रात्री उशिरापर्यंत या तिघांचीही विविध मुद्यांवर चौकशी करत होते.
मीडियाला न्यायालयात बंदी : आज पोलिसांनी तिघांनाही न्यायालयात हजर केले. त्यावेळी माध्यमांना न्यायालयाच्या गेटबाहेरच रोखण्यात आले. अतिक आणि अशरफ यांच्या मारेकर्‍यांची पेशी पाहता पोलिसांनी तेथे चोख बंदोबस्त ठेवला होता. तसेच न्यायालयाबाहेरही पोलिसांचा मोठा फौजफाटा तैनात केला गेला होता. कुणालाही आत किंवा बाहेर जाण्याची परवानगी नव्हती. प्रत्यक्षात अतिक आणि अशरफ यांना मारण्यासाठी हे तिन्ही मारेकरी मीडियावाले म्हणून आले होते. त्यामुळे माध्यमांनाही न्यायालयाच्या बाहेर ठेवण्यात आले होते.
मृतदेहांचे पोस्टमॉर्टम केले : आज अतिक अहमद आणि अशरफ यांच्या मृतदेहांचे पोस्टमॉर्टम करण्यात आले. सायंकाळी शवविच्छेदनानंतर अतिक आणि अश्रफ यांचे मृतदेह थेट कासारी - मासारी येथील स्मशानभूमीत नेण्यात आले आहे. दोघांवरही थोड्याच वेळात अंतिम संस्कार करण्यात येणार आहे.
हे ही वाचा : Atiq Ahmed Wife Shaista Parveen : अतिकची पत्नी शाइस्ता परवीन करू शकते सरेंडर, न्यायालयाभोवती सुरक्षा वाढवली
