Youth Killed By Friends In Kollam : മദ്യ ലഹരിയില്‍ വാക്കുതര്‍ക്കം ; കൊല്ലം ചിതറയില്‍ യുവാവിനെ സുഹൃത്തുക്കള്‍ തലയ്‌ക്കടിച്ച് കൊന്നു

കൊല്ലം : ചിതറയിൽ യുവാവിനെ തലയ്ക്കടിച്ച് കൊലപ്പെടുത്തി (Youth Killed By Friends In Kollam During Argument). ദർപ്പക്കാട് സ്വദേശി സെയ്‌ദലി എന്ന ബൈജു (34) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് നാലുപേരെ പൊലീസ് കസ്റ്റഡിയിലെടുത്തു. ദര്‍പ്പക്കാട് സ്വദേശികളായ ഷാജഹാൻ, നിഹാസ്, ഷാന്‍, ഷെഹീന്‍ എന്നിവരാണ് പിടിയിലായത്. ഇന്നലെ (ഓഗസ്റ്റ് 30) വൈകിട്ട് 6.15 ഓടെയായിരുന്നു സംഭവം. കാറില്‍ പെട്രോള്‍ അടിക്കാന്‍ എത്തിയതായിരുന്നു ബൈജുവും സുഹൃത്തുക്കളും. പെട്രോള്‍ അടിച്ച ശേഷം മാറ്റി പാര്‍ക്കുചെയ്‌ത് കാറില്‍വച്ചുതന്നെ ഇവര്‍ വാക്കുതര്‍ക്കത്തില്‍ ഏര്‍പ്പെടുകയായിരുന്നു. ഇതാണ് കൊലപാതകത്തില്‍ കലാശിച്ചത്. വഴക്കിനിടെ ഷാജഹാനും നിഹാസും കാറില്‍ നിന്നിറങ്ങി മുന്‍ സീറ്റില്‍ ഉണ്ടായിരുന്ന ബൈജുവിനെ പിടിച്ചുവലിച്ച് പുറത്തിറക്കുകയും ഇന്‍റര്‍ലോക്ക് കട്ട കൊണ്ട് തലയ്‌ക്കടിക്കുകയുമായിരുന്നു. തലയില്‍ നിന്ന് രക്തം വാര്‍ന്ന് തറയില്‍ കിടന്ന ബൈജുവിനെ നാട്ടുകാര്‍ ആംബുലന്‍സില്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. രക്ഷപ്പെടാന്‍ ശ്രമിച്ച ഷാജഹാൻ, നിഹാസ് എന്നിവരെ നാട്ടുകാർ തടഞ്ഞുവച്ച് പൊലീസിൽ ഏൽപ്പിച്ചു. കാറിൽ രക്ഷപ്പെട്ട ഷാൻ, ഷെഹീൻ എന്നിവരെ ഏനാത്തുവച്ച് പൊലീസ് പിടികൂടി. മദ്യലഹരിയിലായിരുന്നു ആക്രമണമെന്ന് പൊലീസ് പറഞ്ഞു.