മഴക്കോട്ട് ധരിച്ച് ആടുകള്‍, പിന്നില്‍ ഗണേശന്‍, നിര്‍മിച്ചത് അരിച്ചാക്കുകളാല്‍ ; വൈറല്‍ വീഡിയോ

ഒറത്തനാട്(തമിഴ്‌നാട്): മഴക്കാലമായാല്‍ കുടയോ മഴക്കോട്ടോ കരുതിയിരിക്കണം. മൃഗങ്ങള്‍ക്കും ഇത്തരത്തില്‍ പരിഗണന നല്‍കണമെന്ന് തെളിയിക്കുന്നതാണ് മഴക്കോട്ട് ധരിച്ച് നാട്ടിലാകെ ചുറ്റിത്തിരിയുന്ന ആടുകളുടെ ദൃശ്യം. തഞ്ചാവൂരില്‍ നിന്നുള്ള വീഡിയോയാണ് ഇപ്പോള്‍ സമൂഹമാധ്യമങ്ങളില്‍ പ്രചരിക്കുന്നത്. വര്‍ഷങ്ങളായി ആടുകളെ പരിപാലിക്കുകയും വളര്‍ത്തുകയും ചെയ്യുന്ന തഞ്ചാവൂര്‍ ജില്ലയിലെ ഒറത്തനാട് സ്വദേശിയും കര്‍ഷകനുമായ ഗണേശനാണ് ആടുകള്‍ക്ക് റെയിന്‍ കോട്ടുകള്‍ തുന്നിനല്‍കിയത്. തന്‍റെ ആടുകളെ കുട്ടികളെ പോലെയാണ് ഈ കര്‍ഷകന്‍ പരിപാലിക്കുന്നത്. അതിനാല്‍തന്നെ ഇവയെ മഴ നനയാന്‍ ഗണേശന്‍ അനുവദിക്കില്ല. അരിച്ചാക്കുകള്‍ ഉപയോഗിച്ചാണ് ഇദ്ദേഹം മഴക്കോട്ടുകള്‍ തുന്നിയത്.