Police Vehicle Catches Fire : വെള്ളയമ്പലത്ത് ഓടിക്കൊണ്ടിരുന്ന പൊലീസ് വാഹനത്തിന് തീപിടിച്ചു ; പൂര്‍ണമായി കത്തിനശിച്ചു

തിരുവനന്തപുരം:വെള്ളയമ്പലത്ത് ഓടിക്കൊണ്ടിരുന്ന പൊലീസ് വാഹനത്തിന് തീപിടിച്ചു. സംസ്ഥാന സ്‌പെഷ്യല്‍ ബ്രാഞ്ച് ഡെപ്യൂട്ടി കമാൻഡറുടെ KL01BQ1767 എന്ന നമ്പറിലുള്ള മഹീന്ദ്ര സൈലോ കാറാണ് കത്തിനശിച്ചത്. ഇന്ന് (സെപ്‌റ്റംബര്‍ 20 ബുധനാഴ്‌ച) വൈകിട്ട് 5.30ന് പൊലീസ് ഹെഡ്‌ ക്വാട്ടേഴ്‌സില്‍ നിന്നും മടങ്ങവേ മ്യൂസിയം പരിസരത്തുവച്ചാണ് വാഹനത്തിന് തീപിടിച്ചത്. സംഭവ സമയത്ത് ഡ്രൈവര്‍ മാത്രമാണ് വാഹനത്തില്‍ ഉണ്ടായിരുന്നത്. കാറിന്‍റെ മുന്‍ വശത്തുനിന്നും തീ ഉയരുന്നത് ശ്രദ്ധയില്‍പ്പെട്ട ഡ്രൈവര്‍ വാഹനം നിര്‍ത്തി ഓടി രക്ഷപ്പെട്ടു. അഗ്‌നിശമന സേനാംഗങ്ങള്‍ എത്തിയാണ് തീ അണച്ചത്. വാഹനത്തിലെ ഏസിയുടെ ഗ്യാസ് ലീക്കായതാകാം അഗ്നി ബാധയ്ക്ക് കാരണമെന്നാണ്  പ്രാഥമിക നിഗമനം. ഷോട്ട് സര്‍ക്യൂട്ട് തീപിടിത്തത്തിന് വഴിമരുന്നിട്ടതാകാമെന്നും വിലയിരുത്തലുണ്ട്. അഗ്നി ബാധയില്‍ വാഹനം പൂര്‍ണമായും നശിച്ചു. തിരുവനന്തപുരം അഗ്നിശമന നിലയത്തിൽ നിന്നും ഗ്രേഡ് അസിസ്റ്റന്‍റ് സ്റ്റേഷൻ ഓഫിസർ എസ് ജയകുമാറിന്‍റെ നേതൃത്വത്തിൽ സേനാംഗങ്ങളായ ചന്ദ്രൻ എ, ജസ്റ്റിൻ എസ്ഇ, സനിത്ത് ആർഎസ്, ശരത്ത് ആർ എന്നിവർ അടങ്ങിയ സംഘം എത്തിയാണ്  തീ നിയന്ത്രണ വിധേയമാക്കിയത്.