മകനുമായുണ്ടായ വാക്കേറ്റത്തിന് പിന്നാലെ പിതാവ് മരിച്ച നിലയില്‍ ; യുവാവ് ഒളിവില്‍, തെരച്ചില്‍ ഊര്‍ജിതമാക്കി പൊലീസ്

ആലപ്പുഴ:രാത്രിയിൽ മകനുമായുണ്ടായ വാ​ക്കേറ്റത്തിന്​ പിന്നാലെ പിതാവിനെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി. ആലപ്പുഴ കാളാത്ത്​ തടിയ്ക്കൽ കയർ ഫാക്‌ടറി തൊഴിലാളി സുരേഷ് കുമാറാണ്​ (54) മരിച്ചത്. സംഭവത്തിന്​ പിന്നാലെ മകൻ നിഖില്‍​ ​(24) ഒളിവിലാണ്​. ചൊവ്വാഴ്‌ച (15.08.2023) രാത്രിയിലാണ്​ സംഭവം. മദ്യപിച്ച ശേഷം രാത്രിയിൽ അച്ഛനും മകനും തമ്മിൽ​ വാക്കേറ്റവും ബഹളവും നടന്നതായി മാതാവ്​ മിനിമോൾ പൊലീസിന്​ മൊഴി നൽകിയിട്ടുണ്ട്​. വീടിന്‍റെ ചവിട്ടുപടിയിൽ വീണ്​ കാലിന്​ പരിക്കേറ്റ മിനിമോൾ പ്ലാസ്റ്ററിട്ട്​ കിടപ്പിലാണ്​. ബുധനാഴ്​ച രാവിലെ ഏഴരയായിട്ടും ഭര്‍ത്താവ് ഏഴുന്നേൽക്കാതെ വന്നതോടെ അടുത്ത മുറിയിൽ ചെന്ന്​ നോക്കിയപ്പോഴാണ് സുരേഷ് കുമാറിന്​ അനക്കമില്ലെന്ന്​ തിരിച്ചറിഞ്ഞത്​. തുടർന്ന്​ ഇവര്‍ ബഹളം വച്ച്​ അയൽവാസികളെ കൂട്ടുകയായിരുന്നു. മൃതദേഹത്തിന്‍റെ തലയ്ക്ക്‌​ പിന്നിൽ ആഴത്തിലുള്ള മുറിവുണ്ട്​. ഈ മാസം 28ന്​ നിഖിലിന്‍റെ വിവാഹം നടക്കാനിരിക്കെയാണ്​ സംഭവം. വിവാഹ ആവശ്യത്തിനെടുത്ത പണത്തെ ചൊല്ലിയുണ്ടായ തർക്കമാണ്​ വാക്കേറ്റത്തിൽ കലാശിച്ചെതെന്ന്​ പറയപ്പെടുന്നു. നഗരത്തിലെ കേബിൾ സ്ഥാപനത്തിലെ ജോലിക്കാരനാണ്​ നിഖിൽ. നോർത്ത്​ പൊലീസും വിരലടയാള വിദഗ്‌ധരും സ്ഥലത്തെത്തി പരിശോധന നടത്തി. ഇൻക്വസ്​റ്റ്​ പൂർത്തിയാക്കി മൃതദേഹം വണ്ടാനം മെഡിക്കൽ കോളജിലേക്ക്​ മാറ്റി. പോസ്‌റ്റ്‌മോർട്ടത്തിനുശേഷമേ മരണകാരണം വ്യക്തമാക്കുകയുള്ളൂവെന്ന്​ പൊലീസ്​ അറിയിച്ചു. അതേസമയം ഒളിവിൽ പോയ നിഖിലിനെ ക​ണ്ടെത്താനും പൊലീസ് അന്വേഷണം ഊർജിതമാക്കിയിട്ടുണ്ട്.