ഇന്ന് ഒട്ടുമിക്ക ആളുകളേയും അലട്ടുന്ന പ്രധാന പ്രശ്‌നങ്ങളിലൊന്നാണ് അകാല നര. ജീവിതശൈലിയിലെ മാറ്റങ്ങൾ, ഭക്ഷണ ശീലങ്ങൾ, മാനസിക സമ്മർദം, പോഷകാഹാരക്കുറവ് തുടങ്ങിയ പല കാരണങ്ങള്‍ കൊണ്ടും അകാല നരയുണ്ടാകാം. ജനതിക ഘടനയിലുണ്ടാകുന്ന മാറ്റങ്ങളും അകാല നരയ്ക്ക് ഒരു പ്രധാന കാരണമാണ്.
അകാല നരയ്ക്ക് കാരണം
മുടി നരയ്ക്കുന്നത് വാർധക്യത്തിന്‍റെ ലക്ഷണമായാണ് കണ്ടിരുന്നത്. എന്നാൽ ഇന്ന് ചെറുപ്പക്കാരിലും കൗമാരക്കാരിലും അകാല നര കണ്ടുവരുന്നു. കൃത്യമല്ലാത്ത ഭക്ഷണ ശീലങ്ങൾ, അനാരോഗ്യകരമായ ജീവിതശൈലി, കെമിക്കൽ അടങ്ങിയ ഹെയർ കെയർ ഉൽപ്പന്നങ്ങളുടെ അമിതമായ ഉപയോഗം, ഹെയർ സ്റ്റൈലിങ് എന്നിവയാണ് പൊതുവെ അകാല നരയ്ക്ക് കാരണമായി ഡോക്‌ടര്‍മാർ ചൂണ്ടികാണിക്കുന്നത്.
ആയുർവേദ പ്രകാരം വാതത്തിലും പിത്തത്തിലും ഉണ്ടാകുന്ന അസ്വസ്ഥതകളാണ് അകാല നരയ്ക്ക് കാരണമെന്ന് മുംബൈ നിരോഗ് ആയുർവേദിക് ആശുപത്രിയിലെ ഫിസിഷ്യൻ ഡോ. മനീഷ കാലെ പറയുന്നു. അകാല നരയെ 'അകാൽ പാലിത്യ' എന്നും പറയുന്നു. വാത, പിത്ത ദോഷത്തിന്‍റെ അസന്തുലിതാവസ്ഥ മൂലമാണ് അകാല നരയുണ്ടാകുന്നത്.
പിത്തത്തിലുണ്ടാകുന്ന ദോഷങ്ങള്‍ മെലനോസൈറ്റുകളെ ബാധിക്കുന്നു. മുടിയുടെ നിറം നിർണയിക്കുന്ന പിഗ്‌മെന്‍റായ മെലാനിൻ ഉത്പാദിപ്പിക്കുന്നത് മെലനോസൈറ്റാണ്. പിത്ത ദോഷം മെലനോസൈറ്റുകളെ ബാധിക്കുമ്പോൾ, മെലാനിൻ ഉത്പാദനം തടസപ്പെടുകയും മുടി നരയ്ക്കാനും തുടങ്ങുന്നു. ഇതിന് പുറമേ, ജനിതക ഘടനയിലെ മാറ്റങ്ങളും അകാല നരയ്ക്ക് കാരണമാകുന്നു. മറ്റ് കാരണങ്ങള്‍ ഇതൊക്കെയാകാം-
ശരീരത്തിലെ പോഷകാഹാരക്കുറവ്
മൈദ, പഞ്ചസാര, എണ്ണ തുടങ്ങിയവ കൂടുതല്‍ അടങ്ങിയ ജങ്ക് ഫുഡ്, അൾട്രാ പ്രോസസ്‌ഡ് ഡയറ്റ് ( സോഫ്‌റ്റ് ഡ്രിങ്ക്സ്, ചിപ്പ്സ്, ചോക്ലേറ്റ്, ഐസ്‌ക്രീം തുടങ്ങിയവ), സെഡേറ്റീവ് ഭക്ഷണ പദാര്‍ഥങ്ങള്‍ (ബദാം, കിവി, വാല്‍നട്ട്‌സ്, ചൂടു പാല്‍) എന്നിവ കഴിക്കുന്നതും പോഷകാഹാരങ്ങളുടെ അഭാവവും ദഹനപ്രശ്‌നങ്ങള്‍ മാത്രമല്ല, ശരീരത്തിന്‍റെ പ്രവർത്തനത്തെയും ബാധിക്കുന്നുണ്ട്. തൽഫലമായി, പിത്ത ദോഷങ്ങള്‍ നമ്മുടെ ആരോഗ്യത്തെയും മറ്റ് ശരീര പ്രവർത്തനങ്ങളെയും ബാധിക്കാൻ തുടങ്ങുന്നു. ഇത് മുടി നരയ്ക്കുന്നതിനും മറ്റ് ആരോഗ്യ പ്രശ്‌നങ്ങള്‍ക്കും വഴിവയ്ക്കുന്നു.
ഉറക്കമില്ലായ്‌മ
ഉറക്കക്കുറവ് ശാരീരികവും മാനസികവുമായ നിരവധി ആരോഗ്യ പ്രശ്‌നങ്ങൾക്ക് കാരണമാകുന്നു. ഉറക്കക്കുറവ് മൂലം ശരീരത്തിൽ വീക്കം ഉണ്ടാകുന്നു. ഇത് മെലാനിൻ ഉത്പാദനത്തെ ബാധിക്കുകയും അകാല നരയുണ്ടാകാന്‍ കാരണമാകുകയും ചെയ്യുന്നു.
ഇരുമ്പിന്‍റെ അളവ് കുറയുന്നത്
ഇരുമ്പിന്‍റെ അളവ് കുറയുന്നത് ശരീരത്തിലെ ഹീമോഗ്ലോബിന്‍റെ അളവ് കുറയ്ക്കുന്നു. ഇത് അകാല നരയ്ക്ക് കാരണമാകുന്നു.
സമ്മർദം
അമിത സമ്മർദം മൂലം ശരീരത്തിൽ നോറെപിനെഫ്രിൻ എന്ന ഹോർമോൺ ഉത്പാദിപ്പിക്കപ്പെടുന്നു. ഇത് മെലനോസൈറ്റ് കോശങ്ങളെ നശിപ്പിക്കുന്നു. മുടിയുടെ പിഗ്മെന്‍റിന് മെലനോസൈറ്റുകൾ കാരണമാകുന്നതിനാൽ, മുടിയുടെ നിറം മാറുകയും വെള്ള നരകള്‍ പ്രത്യക്ഷപ്പെടുകയും ചെയ്യുന്നു.
പുകവലി
അമിതമായി പുകവലിക്കുന്നവരുടെ ശരീരത്തില്‍ വിഷ പദാർഥങ്ങള്‍ അടിഞ്ഞുകൂടുന്നു. ഇത് നമ്മുടെ ആരോഗ്യത്തെ പ്രതികൂലമായി ബാധിക്കുകയും സാധാരണ പ്രവർത്തനത്തെ തടസപ്പെടുത്തുകയും പ്രതിരോധശേഷി കുറയ്ക്കുകയും ചെയ്യുന്നു.
എങ്ങനെ പരിപാലിക്കണം?
മേൽപ്പറഞ്ഞ കാരണങ്ങൾ കൂടാതെ, ഷാംപൂ, ഹെയർ കളറുകൾ, ഹെയർ ബ്ലീച്ച്, ജെൽ, കഠിനമായ രാസവസ്‌തുക്കൾ നിറഞ്ഞ ഹെയർ സ്റ്റൈലിങ് ഉൽപന്നങ്ങൾ എന്നിവയുടെ അമിതമായ ഉപയോഗവും മുടിയെ വലിയ തോതിൽ നശിപ്പിക്കുമെന്ന് ഡോ. മനീഷ പറയുന്നു. അതിനാൽ, കഴിയുന്നിടത്തോളം ഏറ്റവും കുറഞ്ഞ അളവിൽ രാസവസ്‌തുക്കൾ അടങ്ങിയ ഹെയര്‍ കെയര്‍ ഉത്പന്നങ്ങള്‍ ഉപയോഗിക്കാന്‍ ശ്രദ്ധിക്കുക
ഇരുമ്പ്, കോപ്പര്‍, പ്രോട്ടീൻ, വിറ്റാമിനുകൾ എന്നിവ കൂടുതല്‍ അടങ്ങിയ ഭക്ഷണങ്ങൾ ദൈനംദിന ഭക്ഷണത്തിൽ ഉൾപ്പെടുത്തുക. മുടിയുടെ ആരോഗ്യവും ഗുണവും നിലനിർത്താൻ സഹായിക്കുന്ന നിരവധി ഹെയർ ഓയിലുകളും ഔഷധങ്ങളും ആയുർവേദത്തിൽ പരാമർശിച്ചിട്ടുണ്ട്. കൃത്യസമയത്ത് ഉറങ്ങുന്നതും ആരോഗ്യകരവും സമീകൃതവുമായ ഭക്ഷണക്രമവും അകാല നര അകറ്റാന്‍ പ്രധാനമാണ്.
Also read: എന്താണ് ലസ്സ പനി ? ; അറിയേണ്ടതെല്ലാം
