ആളുകളില്‍ വിറ്റാമിൻ ഡിയുടെ കുറവ് മൂലമുള്ള പ്രശ്‌നങ്ങള്‍ സാധാരണയായി കണ്ടുവരാറുണ്ട്. ലോകമെമ്പാടുമുള്ള എല്ലാ പ്രായത്തിലുമുള്ള ആളുകളിലും ഇവ കാണപ്പെടാറുണ്ടെന്നത് വസ്‌തുതയാണ്. ഭക്ഷണം, ജീവിതശൈലി എന്നിവയിലെ പോരായ്‌മകള്‍ ഇവയൊക്കെയാണ് ഇങ്ങനെയൊരു പ്രശ്‌നത്തിലേക്ക് ആളുകളെ നയിക്കുന്നത്. കഴിഞ്ഞ ഒരു ദശകംകൊണ്ടാണ് വിറ്റാമിന്‍ ഡിയുടെ കുറവുകൊണ്ടുള്ള ആരോഗ്യ പ്രശ്‌നങ്ങള്‍ ആളുകളില്‍ വര്‍ധിച്ചത്. പുറമെ, കൊവിഡ് മഹാമാരി വ്യാപനം ആളുകളിലെ വിറ്റാമിന്‍റെ കുറവ് മുന്‍പുള്ളതിനേക്കാള്‍ കൂട്ടിയെന്നാണ് ആരോഗ്യ രംഗത്തെ വിദഗ്‌ധര്‍ പറയുന്നത്.
വിറ്റാമിന്‍ പ്രശ്‌നം വര്‍ധിച്ചത് 90 ശതമാനത്തോളം: എല്ലുകളുടെ ആരോഗ്യം നിലനിർത്താൻ മാത്രമല്ല വിറ്റാമിൻ ഡി ശരീരത്തിന് ആവശ്യമുള്ളത്. ശരീരത്തിന്‍റെ പുഷ്‌ടിപ്പിനും രോഗങ്ങളെ മറികടക്കാനും ശാരീരിക പ്രവർത്തനങ്ങള്‍ സുഗമമായി നടക്കുന്നതിനും വിറ്റാമിൻ ഡി വേണ്ടതുണ്ട്. ശരീരത്തില്‍ ഈ പോഷകത്തിന്‍റെ അഭാവം മാനസികമായ പല പ്രശ്‌നങ്ങൾക്കും കാരണമാകുമെന്നും ശാസ്‌ത്രം കണ്ടെത്തിയിട്ടുണ്ട്. വിറ്റാമിൻ ഡിയുടെ കുറവ് എല്ലാ പ്രായത്തിലുമുള്ള ആളുകളിലും വളരെ സാധാരണയായി കാണാറുണ്ടെങ്കിലും വന്‍ തോതില്‍ ഇതിന്‍റെ കുറവുള്ള കേസുകൾ ആശങ്കാജനകമാണ്. കൊവിഡ് ബാധിച്ചവരില്‍ വിറ്റാമിൻ ഡിയുടെ കുറവ് വലിയ തോതിലുണ്ട്. ഇക്കാരണം കൊണ്ടുതന്നെ കൊവിഡ് ബാധിച്ചവരുടെ പ്രതിരോധ ശേഷിയെ വളരെയധികം ബാധിച്ചിട്ടുണ്ട്.
2020ൽ, ചിക്കാഗോ സർവകലാശാല നടത്തിയ ഗവേഷണത്തിൽ വിറ്റാമിൻ ഡിയുടെ കുറവുള്ള 20 ശതമാനം പേർക്കും കൊവിഡ് സ്ഥിരീകരിക്കുന്നതായി കണ്ടെത്തി. ശരീരത്തിലെ വിറ്റാമിന്‍ ഡിയുടെ കുറവ് ആളുകളിലേക്ക് കൊവിഡ് പടര്‍ത്താന്‍ ഇടയാക്കുന്നുവെന്ന് മറ്റൊരു ഗവേഷണത്തിലും സ്ഥിരീകരിച്ചിരുന്നു. കൊവിഡ് കാലഘട്ടത്തിന് മുന്‍പ് വിറ്റാമിൻ ഡിയുടെ കുറവ് 40 ശതമാനം ആളുകളിലായിരുന്നു കണ്ടെത്തിയിരുന്നത്. എന്നാല്‍, ഇപ്പോൾ കണക്ക് 90 ശതമാനത്തിലേറെയായി വർധിച്ചിരിക്കുകയാണ്. ശരീരത്തിൽ വിറ്റാമിന്‍ ഡിയുടെ അമിതമായ കുറവ് കാണപ്പെടുന്നത് കൊവിഡ് ബാധിച്ചതിനെ തുടര്‍ന്നുള്ള പാര്‍ശ്വഫലമാണെന്ന് ആരോഗ്യ വിദഗ്‌ധര്‍ ചൂണ്ടിക്കാട്ടുന്നു.
പോഷകമടങ്ങിയ ഭക്ഷണത്തിന്‍റെ കുറവ് ഒരു പ്രശ്‌നമാണ്: കൊവിഡ് ബാധിച്ചതിനുശേഷം പലതരത്തിലുള്ള ബുദ്ധിമുട്ടാണ് ആളുകള്‍ നേരിടുന്നത്. അതിലൊന്നാണ് ശരീരത്തില്‍ പ്രതിരോധ ശേഷിയിലുണ്ടാവുന്ന വ്യതിയാനത്തെ തുടര്‍ന്നുള്ള വിഷയങ്ങളെന്ന് ലഖ്‌നൗവിലെ ഓർത്തോപീഡിക് ഡോക്‌ടറായ ഡോ. റാഷിദ് ഖാൻ പറയുന്നു. രോഗപ്രതിരോധ ശേഷിയെ ബാധിക്കുന്നതിനാല്‍ ആളുകളില്‍ പല തരത്തിലുള്ള വേദനകള്‍ക്കും മറ്റ് ആരോഗ്യപ്രശ്‌നങ്ങള്‍ക്കും കാരണമാവുന്നു. ഭക്ഷണത്തിലൂടെ പോഷകങ്ങൾ ശരീരത്തിലെത്തിക്കാന്‍ കഴിയാത്തവരില്‍ ഇത്തരത്തിലുള്ള പാര്‍ശ്വഫലം ദൃശ്യമാക്കുന്നുണ്ട്.
കാൽസ്യം, ഫോസ്ഫേറ്റ്, മഗ്നീഷ്യം തുടങ്ങിയ ധാതുക്കളും ശരീരത്തിലെ മറ്റ് പല പോഷകങ്ങളും ആഗിരണം ചെയ്യാൻ വിറ്റാമിൻ ഡി നമുക്ക് സഹായമേകുന്നുണ്ട്. ഇതുകൊണ്ട് തന്നെയാണ് നമ്മുടെ എല്ലുകളും പേശികളും ശക്തമായി നിലനിൽക്കുന്നത്. ഹൃദയം, വൃക്കകൾ, ശരീരത്തിന്‍റെ മറ്റ് പല ഭാഗങ്ങൾ എന്നിവയുമായി ബന്ധപ്പെട്ട പ്രശ്‌നങ്ങള്‍ തടയാനും ഇത് സഹായിക്കുന്നു. നമ്മുടെ പ്രതിരോധശേഷി ശക്തിപ്പെടുത്തുന്നതിനൊപ്പം ശരീരത്തിലെ പല ഹോർമോൺ പ്രവർത്തനങ്ങളെ നിയന്ത്രിക്കാനും വേണ്ടി വിറ്റാമിന്‍ ഡി പ്രവർത്തിക്കുന്നുവെന്നത് വാസ്‌തവം.
ഇങ്ങനെയാണ് കാര്യങ്ങള്‍ എന്നിരിക്കെ ശരീരത്തിലെ വിറ്റാമിൻ ഡിയുടെ കുറവ് ശാരീരിക പ്രശ്‌നങ്ങള്‍ക്കും നാഡീസംബന്ധമായ തകരാറുകൾക്കും കാരണമാവും. 2021ൽ മെഡിക്കൽ ജേർണൽ നേച്ചര്‍ പ്രസിദ്ധീകരിച്ച പഠനത്തിൽ ഇന്ത്യ, അഫ്‌ഗാനിസ്ഥാൻ, ടുണീഷ്യ തുടങ്ങിയ രാജ്യങ്ങളിൽ ജനസംഖ്യയുടെ 20 ശതമാനം പേരും വിറ്റാമിൻ ഡിയുടെ കുറവ് അനുഭവിക്കുന്നുണ്ടെന്ന് വ്യക്തമാക്കുന്നു. ഇന്ത്യയിൽ അത് ഏകദേശം 49 കോടി ആളുകൾക്കാണ് ഇതിന്‍റെ അഭാവം കണ്ടെത്തിയതെന്നും ഡോ. റാഷിദ് വ്യക്തമാക്കുന്നു.
വിറ്റാമിന്‍ ഡിയുടെ കുറവ് ഉണ്ടാക്കുന്ന ആരോഗ്യ പ്രശ്‌നങ്ങള്‍
- എപ്പോഴും ക്ഷീണവും അലസതയും അനുഭവപ്പെടുക
- സന്ധിവേദന. പ്രധാനമായും പുറം ഭാഗങ്ങളിലും മുട്ടുകളിലുമുള്ള വേദന
- മുടി കൊഴിച്ചില്‍
- മാനസികാവസ്ഥയിലുണ്ടാവുന്ന വ്യതിയാനം
- അമിതമായ സമ്മർദം
- പ്രതിരോധശേഷി ദുർബലപ്പെടുന്നത്
- മുറിവുകള്‍ ഭേദപ്പെടാത്ത അവസ്ഥ
ഇത്തരത്തിലുള്ള ലക്ഷണങ്ങൾ വളരെ സാധാരണമായതിനാൽ, മിക്ക ആളുകളും ഇവയൊന്നും മുഖവിലയ്‌ക്കെടുക്കാറില്ല. വിറ്റാമിൻ ഡിയുടെ കുറവ് അമിതമായാൽ മുകളില്‍ പറഞ്ഞ ലക്ഷണങ്ങള്‍ കൂടുതലാവും. പുറമെ, ശരീരത്തിൽ മറ്റ് പല രോഗങ്ങള്‍ ഉണ്ടാവാനുള്ള സാധ്യത വർധിക്കുന്നു. നാഡി, ഹൃദയം സംബന്ധമായ രോഗങ്ങളും കാൻസർ പോലുമുണ്ടാവാന്‍ വിറ്റാമിന്‍റെ കുറവ് കാരണമാവുന്നു. ഗർഭകാലത്ത് സ്‌ത്രീകള്‍ക്ക് പലതരത്തിലുള്ള സങ്കീർണതകള്‍ നേരിടുന്നതിലേക്കും ഇത് നയിച്ചേക്കും. കുട്ടിയുടെ വളര്‍ച്ച കുറയുന്നതിലേക്ക് കാര്യങ്ങള്‍ എത്തിക്കാനും ഇതിന്‍റെ അപര്യാപ്‌തത നയിച്ചേക്കും.
വിറ്റാമിന്‍ ഡി കിട്ടാന്‍ ചെയ്യേണ്ടത്?: ശരിയായി ഭക്ഷണം കഴിക്കുക എന്നത് വിറ്റാമിന്‍ ശരീരത്തിലേക്ക് എത്തിക്കാന്‍ സഹായിക്കും. പ്രത്യേകിച്ച് വിറ്റാമിൻ ഡി അടങ്ങിയ പാൽ, പാലുത്‌പന്നങ്ങളായ തൈര്, വെണ്ണ പുറമെ മുട്ട, ഓറഞ്ച്, കൂൺ, ധാന്യങ്ങൾ, സോയ ഉത്‌പന്നങ്ങൾ, മത്സ്യം എന്നിവ ഭക്ഷണത്തില്‍ ഉള്‍പ്പെടുത്തുക. പുറമെ ദിവസവും 20 മുതൽ 30 മിനിറ്റ് വരെ വെയിലത്ത് നടക്കുക. ആവശ്യമെങ്കിൽ ടാബ്‌ലറ്റുകളും കഴിക്കുക.
കാലം കൂടെ കണക്കിലെടുത്ത് വേണം ശരീരത്തില്‍ വെയില്‍ എല്‍പ്പിക്കാന്‍. സൂര്യപ്രകാശത്തിന്‍റെ തീവ്രത ഓരോ കാലത്തും വ്യത്യസ്‌തമാണ്. അമിതമായി സൂര്യപ്രകാശമേല്‍ക്കുന്നത് ചർമവുമായി ബന്ധപ്പെട്ട പല ആരോഗ്യ പ്രശ്‌നങ്ങൾക്കും കാരണമാവും. വേനൽക്കാലത്ത് രാവിലെ 10 മണി വരെ സൂര്യപ്രകാശമേല്‍ക്കുന്നത് പ്രയോജനകരമാണ്. ശൈത്യകാലത്ത് ഉച്ചവരെ വെയിലേല്‍ക്കാം. വിറ്റാമിന്‍ ടാബ്‌ലറ്റുകളുടെ ആവശ്യകത ഡോക്‌ടറോട് ചോദിച്ചതിന് ശേഷം മാത്രം ഉപയോഗിക്കുന്നതാണ് ഉചിതം. കാരണം ശരീരത്തിൽ വിറ്റാമിൻ ഡി അമിതമായാല്‍ ആരോഗ്യത്തെ പ്രതികൂലമായി ബാധിച്ചേക്കും.
