മാവോയിസ്റ്റ് ഭീഷണി നിലനില്‍ക്കുന്നതിനാല്‍ പുല്‍വാമയില്‍ കൊല്ലപ്പെട്ട ധീരജവാന്‍ വസന്തകുമാറിന്‍റെ വീട്ടില്‍ രാഹുല്‍ ഗാന്ധി സന്ദര്‍ശനം നടത്തില്ല. സുരക്ഷാ ഏജന്‍സികള്‍ നല്‍കിയ മുന്നറിയിപ്പിനെ തുടര്‍ന്നാണ് യാത്ര റദ്ദാക്കാന്‍ കോണ്‍ഗ്രസ് തീരുമാനിച്ചത്.
യുഡിഎഫ് തെരഞ്ഞെടുപ്പ് പ്രചാരണം ഉദ്ഘാടനം ചെയ്യാന്‍ കേരളത്തിലെത്തുന്ന രാഹുല്‍ വസന്തകുമാറിന്‍റെ വീട് സന്ദര്‍ശിക്കുമെന്നായിരുന്നു കോണ്‍ഗ്രസ് ആദ്യം അറിയിച്ചിരുന്നത്. എന്നാല്‍ വൈത്തിരിയില്‍ മാവോയിസ്റ്റ് നേതാവ് ഏറ്റുമുട്ടലില്‍ കൊല്ലപ്പെട്ടതിനെത്തുടര്‍ന്ന് ജില്ലയിലെ മാവോയിസ്റ്റ് ശക്തി കേന്ദ്രങ്ങളിലെല്ലാം കനത്ത ജാഗ്രത പുലര്‍ത്തുകയാണ്. ഇതേത്തുടര്‍ന്നാണ് യാത്ര റദ്ദാക്കാന്‍ തീരുമാനമെടുത്തത്.
അതേ സമയം കാസര്‍കോട് പെരിയയില്‍ കൊല്ലപ്പെട്ട യൂത്ത് കോണ്‍ഗ്രസ് പ്രവര്‍ത്തകരുടെ വീടുകള്‍ രാഹുല്‍ സന്ദര്‍ശിക്കും. ഇതിന് ശേഷം കോഴിക്കോട് നടക്കുന്ന പൊതുപരിപാടിയിലും രാഹുല്‍ ഗാന്ധി പങ്കെടുത്തേക്കും.
