വയനാട്: തിരുനെല്ലി മഹാവിഷ്‌ണു ക്ഷേത്ര നവീകരണ പ്രവർത്തനങ്ങൾ നിർത്തി വയ്ക്കാൻ ഹൈക്കോടതിയുടെ ഇടക്കാല ഉത്തരവ്. മലബാർ ദേവസ്വം ബോർഡിന് കീഴിലുള്ള വയനാട് തിരുനെല്ലി മഹാവിഷ്‌ണു ക്ഷേത്ര നവീകരണ പ്രവർത്തനങ്ങൾ 10 ദിവസത്തേക്ക് നിർത്തി വയ്ക്കാനാണ് ഹൈക്കോടതിയുടെ ഇടക്കാല ഉത്തരവ്. പുരാവസ്‌തു വകുപ്പ് ഡയറക്‌ടറുടെ റിപ്പോർട്ട് പരിഗണിച്ച് ജസ്‌റ്റിസുമാരായ അനിൽ കെ നരേന്ദ്രൻ, പി ജി അജിത് കുമാർ എന്നിവരുൾപ്പെട്ട ഡിവിഷൻ ബഞ്ചിന്‍റേതാണ് നടപടി.
ക്ഷേത്രത്തിന്‍റെ നവീകരണപ്രവർത്തനങൾ പരിശോധിക്കാൻ കോടതി അഭിഭാഷക കമ്മിഷനെയും നിയോഗിച്ചിട്ടുണ്ട്. അഡ്വ എം ആർ അരുൺ കുമാർ ആണ് കോടതി നിയോഗിച്ച അഭിഭാഷക കമ്മിഷൻ. വരുന്ന 28ന് അഭിഭാഷക കമ്മിഷൻ പരിശോധന നടത്തും. കോഴിക്കോട് സ്വദേശി വി സലീഷ് നൽകിയ ഹർജിയിലാണ് കോടതി ഇടപെടൽ. ക്ഷേത്രത്തിൽ നവീകരണ പ്രവർത്തനങ്ങൾ നടത്തുന്നത് പുരാതന ശേഷിപ്പുകൾക്ക് കേടുപാട് വരുത്തിയാണെന്ന് ചൂണ്ടിക്കാട്ടിയായിരുന്നു ഹർജി.
നിലവിലെ നവീകരണ പ്രവർത്തനത്തിന്‍റെ ഭാഗമായി ക്ഷേത്രത്തിലെ സ്‌തംഭങ്ങളടക്കം പൊളിച്ചു നീക്കിയതായും മലബാർ ദേവസ്വം ബോർഡിന്‍റെയും ക്ഷേത്ര എക്‌സിക്യുട്ടീവ് ഓഫിസറുടെയും നടപടിയിൽ കോടതി ഇടപെടൽ വേണമെന്നുമായിരുന്നു ആവശ്യം.
വയനാട് ജില്ലയിൽ പൈതൃകം വിളിച്ചോതുന്ന പ്രശസ്‌തമായ ഹൈന്ദവ ക്ഷേത്രമാണ് തിരുനെല്ലി മഹാവിഷ്‌ണു ക്ഷേത്രം. ഇവിടുത്തെ പാപനാശിനി പുഴയിൽ നടക്കുന്ന ബലിപൂജകൾ പ്രസിദ്ധമാണ്. സഹ്യമലക്ഷേത്രം, ബ്രഹ്മഗിരി ക്ഷേത്രം എന്നും അറിയപ്പെടുന്ന തിരുനെല്ലി ക്ഷേത്രം കമ്പമല, കരിമല, വരഡിഗ മലകൾ എന്നിവയാൽ ചുറ്റപ്പെട്ടാണ് സ്ഥിതി ചെയ്യുന്നത്. 30 കരിങ്കൽ തൂണുകളാൽ താങ്ങി നിറുത്തിയിരിക്കുന്ന തിരുനെല്ലി ക്ഷേത്രം മികച്ച നിർമാണ മികവിന്‍റെയും ഉത്തമ ഉദാഹരണമാണ്. കർക്കിടക, തുലാം, കുംഭം മാസങ്ങളിലെ കറുത്തവാവ് ബലി, പുത്തരി, ചുറ്റുവിളക്ക്, നവരാത്രി, ശിവരാത്രി എന്നിവയാണ് ക്ഷേത്രത്തിലെ പ്രധാന ദിനങ്ങൾ.
