പിഎസ്‌സി നിയമനത്തില്‍ ക്രമക്കേടെന്ന് ആരോപണം; ഉദ്യോഗാര്‍ഥികള്‍ പ്രതിഷേധിച്ചു

പ്രാക്തന ഗോത്രവർഗ വിഭാഗത്തിൽ നിന്നും പൊലീസ് സേനയിലേക്ക് പിഎസ്‌സി വഴി നടത്തിയ പ്രത്യേക നിയമനത്തില്‍ ക്രമക്കേടെന്നാണ് ആരോപണം

കല്‍പ്പറ്റ: സംസ്ഥാന പൊലീസ് സേനയിലേക്ക് വയനാട്ടിലെ പ്രാക്തന ഗോത്രവർഗ വിഭാഗത്തിൽ നിന്ന് നടത്തിയ പ്രത്യേക നിയമനത്തിൽ അനർഹർക്ക് അവസരം നൽകിയതായി ആരോപണം. നിയമന ശുപാര്‍ശ വിതരണ ചടങ്ങ് നടക്കുന്ന കല്‍പ്പറ്റയിലെ വേദിയിലെത്തി ഉദ്യോഗാര്‍ഥികള്‍ പ്രതിഷേധിച്ചു. പിഎസ്‌സി ചെയർമാൻ അഡ്വ: എം.കെ. സക്കീർ ഉള്‍പ്പെടെ വേദിയില്‍ ഉള്ളപ്പോഴായിരുന്നു പ്രതിഷേധം.

പണിയ, അടിയ, കാട്ടുനായ്ക്ക, ഊരാളി വിഭാഗത്തിൽ നിന്നുള്ളവർക്കായിരുന്നു റിക്രൂട്ട്മെന്‍റ്. വനാതിർത്തിയിലും, സെറ്റിൽമെന്‍റ് കോളനികളിലും താമസിക്കുന്നവർക്കാണ് മുൻഗണന നൽകേണ്ടത്. എന്നാൽ ശാരീരികക്ഷമതാ പരീക്ഷയിൽ തോറ്റവർക്കും, നഗര പ്രദേശത്ത് താമസിക്കുന്നവർക്കും നിയമന ശുപാർശ നൽകിയിട്ടുണ്ടെന്ന് ഉദ്യോഗാർഥികള്‍ ആരോപിക്കുന്നു.