നടുറോഡിൽ യുവാവിന് ക്രൂരമർദ്ദനം: പൊലീസിനെതിരെ ആരോപണവുമായി അമ്മ

നിസാര വകുപ്പുകൾ മാത്രം ചുമത്തി തന്‍റെ മുന്നില്‍ വച്ചുതന്നെ ഒന്നാം പ്രതി ഷിബുവിനെ ജാമ്യത്തിൽ വിട്ടയച്ചുവെന്നും മകൻ മരിച്ചിരുന്നെങ്കില്‍ മാത്രമേ കേസെടുക്കാൻ കഴിയുകയുള്ളുവെന്നും പൊലീസ് പറഞ്ഞെന്നും അമ്മ ഉഷ

തിരുവനന്തപുരം: പോത്തൻകോട് നടുറോഡിൽ യുവാവിനെ ക്രൂരമായി മർദ്ദിച്ച സംഭവത്തിൽ പ്രതികള്‍ക്കെതിരെ നിസാര വകുപ്പുകള്‍ മാത്രമാണ് പൊലീസ് ചുമത്തിയതെന്ന് മര്‍ദ്ദനത്തിനിരയായ അനൂപിന്‍റെ അമ്മ. നിസാര വകുപ്പുകൾ മാത്രം ചുമത്തി അമ്മയുടെ മുന്നില്‍ വച്ചുതന്നെ ഒന്നാം പ്രതി ഷിബുവിനെ സ്റ്റേഷൻ ജാമ്യത്തിൽ പോത്തൻകോട് പൊലീസ് വിട്ടയച്ചുവെന്നും അമ്മ ഉഷ പറഞ്ഞു. മകൻ മരണപ്പെട്ടിരുന്നുവെങ്കില്‍ മാത്രമേ കേസെടുക്കാൻ കഴിയുകയുള്ളുവെന്നാണ് പൊലീസ് പറഞ്ഞതെന്നും അമ്മ കൂട്ടിച്ചേര്‍ത്തു. വധശ്രമമടക്കമുള്ള വകുപ്പുകൾ ചേർത്ത് ആദ്യം കേസെടുത്ത പോത്തൻകോട് പൊലീസ് പിന്നീട് സമ്മർദ്ദങ്ങൾക്ക് വഴങ്ങി സ്റ്റേഷൻ ജാമ്യം കിട്ടുന്ന നിസാര വകുപ്പ് ചുമത്തിയെന്നാണ് ആരോപണം. പ്രതിയെ വിട്ടയച്ചതില്‍ അനൂപിന്‍റെ അമ്മ സ്റ്റേഷന് മുന്നില്‍ പ്രതിഷേധിച്ചു. മകനെ തല്ലിച്ചതച്ചവര്‍ക്കെതിരെ മതിയായ ശിക്ഷാ നടപടി സ്വീകരിക്കണമെന്നാവശ്യപ്പെട്ട് ഉന്നതാധികാരികള്‍ക്ക് പരാതി നല്‍കുമെന്നും അമ്മ പറഞ്ഞു.

സംഭവത്തിൽ പൊലീസിന്‍റെ ഭാഗത്ത് വീഴ്ചയുണ്ടായതായി സ്പെഷ്യൽ ബ്രാഞ്ച് റിപ്പോർട്ട് നൽകിയിട്ടുണ്ട്. എന്നാൽ ഇരുകൂട്ടരും മർദ്ദിക്കുന്ന ദൃശ്യങ്ങൾ പൊലീസിന് ലഭിച്ചുവെന്നും സംഭവത്തിൽ ഇരു കൂട്ടർക്കെതിരെയും കേസെടുത്തിട്ടുണ്ടെന്നും പോത്തൻകോട് എസ് ഐ വി.എസ്. അജീഷ് പറഞ്ഞു. അതിനാല്‍ സ്റ്റേഷൻ ജാമ്യം നൽകേണ്ട വകുപ്പ് മാത്രമെ പ്രതികള്‍ക്കെതിരെ ചുമത്താനാകുവെന്നും അദ്ദേഹം അറിയിച്ചു.തിരുവനന്തപുരം പോത്തൻകോട് ജംഗ്ഷനിൽ കഴിഞ്ഞ 30 നാണ് നന്നാട്ടുകാവ് സ്വദേശിയായ അനൂപിനെ രണ്ട് പേര്‍ നടുറോഡിലിട്ട് മർദ്ദിച്ചത്. ഇരുചക്ര വാഹനങ്ങൾ കൂട്ടിമുട്ടിയതുമായി ബന്ധപ്പെട്ട് തുറിച്ചു നോക്കി എന്നാരോപിച്ച് നടന്ന വാക്കുതർക്കമാണ് അക്രമത്തിൽ കലാശിച്ചത്. റോഡില്‍വച്ച് വാക്കേറ്റമുണ്ടായ ഒന്നാം പ്രതി ഷിബു സുഹൃത്തിനെ വിളിച്ചു വരുത്തിയാണ് അനൂപിനെ മര്‍ദ്ദിച്ചത്. കാര്യമായി പരിക്കേറ്റ അനൂപിനെ 108 ആംബുലൻസിലാണ് മെഡിക്കൽ കോളജിലെത്തിച്ചത്. യുവാവിനെ പ്രതികള്‍ മര്‍ദ്ദിക്കുന്നതിന്‍റെ വീഡിയോ സാമൂഹ്യ മാധ്യമങ്ങളില്‍ വ്യാപകമായി പ്രചരിച്ചതിനെ തുടര്‍ന്നാണ് പൊലീസ് കേസ് രജിസ്റ്റര്‍ ചെയ്തത്.