പ്രായപൂർത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ പിടിയിലായ തൊളിക്കോട് ജമാ അത്ത് മുൻ ഇമാം ഷെഫീക്ക് ഖാസിമിയെ ഇന്ന് കോടതിയിൽ ഹാജരാക്കും. ഇന്നലെ മധുരയിൽ നിന്നും പിടികൂടിയ ഷെഫീക്ക് ഖാസിമിയും സഹായി ഫാസിലും വലിയമല പൊലീസ് സ്റ്റേഷനിലാണ് ഉള്ളത്. പെണ്‍കുട്ടിയെ തട്ടിക്കൊണ്ടുപോയ സ്ഥലത്തെത്തിച്ച് തെളിവെടുത്തേക്കും. ചോദ്യം ചെയ്യലും തെളിവെടുപ്പും പൂർത്തിയാക്കി നെടുമങ്ങാട് കോടതിയിലാണ് ഖാസിമിയെ ഹാജരാക്കുക. കേസ് പിന്നീട് പോക്സോ കോടതിയിലേക്ക് മാറ്റും.
ഒപ്പമുണ്ടായിരുന്ന സഹായി ഫാസിലിന്‍റെ കാറിൽ പകൽ കറങ്ങിയ ശേഷം രാത്രിയിൽ ലോഡ്ജിൽ മുറിയെടുക്കുകയായിരുന്നു ഖാസിമിയുടെ രീതി. മുറിയെടുക്കാന്‍ ഫാസിലിന്‍റെ തിരിച്ചറിയൽ കാർഡും മറ്റുള്ളവരുമായി ബന്ധപ്പെടാന്‍ ഫാസിലിന്‍റെ ഫോണും ഉപയോഗിക്കും. സഹോദരൻ നൗഷാദിന്‍റെ സുഹൃത്തുക്കളുടെ അക്കൗണ്ടിലേക്ക് ഇമാമിന് വേണ്ടിയുള്ള പണം ബന്ധുക്കളും സുഹൃത്തുക്കളും കൈമാറിയിരുന്നതായും അന്വേഷണത്തിൽ കണ്ടെത്തി.
സഹോദരൻ നൗഷാദിനെ കോയമ്പത്തൂരിൽ നിന്നും പിടികൂടിയപ്പോഴാണ് ഇമാമിന് സഹായത്തിനായി നില്‍ക്കുന്ന ഫാസിലിനെക്കുറിച്ച് പൊലീസിന് വിവരം ലഭിക്കുന്നത്. തുടർന്ന് നടത്തിയ അന്വേഷണത്തിൽ ഇമാം മധുരയിലുണ്ടെന്ന് കണ്ടെത്തുകയായിരുന്നു. മധുരയിൽ വാഹനത്തിൽ കറങ്ങുമ്പോഴാണ് ക്രൈം ബ്രാഞ്ച് ഡിവൈഎസ്പി ഡി അശോകന്‍റെ നേതൃത്വത്തിലുള്ള അന്വേഷണ സംഘം ഇമാമിനെയും ഫാസിലിനെയും പിടികൂടുന്നത്. 16 സ്ഥലങ്ങളിലാണ് ഇമാം ഒളിവില്‍ കഴിഞ്ഞത്. കഴിഞ്ഞ മാസം 12നാണ് പ്രായപൂർത്തിയാകാത്ത പെണ്‍കുട്ടിയെ വാഹനത്തിൽ തട്ടികൊണ്ട് പോയി പീഡിപ്പിച്ചതിന് വിതുര പൊലീസ് ഇമാമിനെതിരെ കേസെടുത്തത്. പ്രതിയുടെ മുൻകൂർ ജാമ്യാപേക്ഷ ഹൈക്കോടതി പരിഗണിക്കാനിരിക്കെയാണ് അറസ്റ്റ്.
