തിരുവനന്തപുരം: കെപിസിസി നിർവാഹക സമിതി യോഗം ഇന്ന് ചേരും. കെപിസിസി ആസ്ഥാനത്ത് രാവിലെ 10.30നാണു യോഗം. കെപിസിസി ഭാരവാഹികൾ, എക്സിക്യൂട്ടിവ് കമ്മിറ്റി അംഗങ്ങൾ, പോഷക സംഘടനകളുടെ അധ്യക്ഷന്മാർ തുടങ്ങിയവരാണ് യോഗത്തിൽ പങ്കെടുക്കുന്നത്.
സില്‍വര്‍ ലൈന്‍ മൂന്നാം ഘട്ടം ഏപ്രില്‍ അവസാനവും മെയ് ആദ്യവുമായി നടത്തുന്നത് സംബന്ധിച്ച കാര്യങ്ങള്‍ യോഗത്തില്‍ ചര്‍ച്ച ചെയ്യും. പാര്‍ട്ടി വിലക്ക് ലംഘിച്ച് സിപിഎം പാര്‍ട്ടി കോണ്‍ഗ്രസില്‍ പങ്കെടുത്ത കെ.വി തോമസിന് എതിരെയുളള തുടര്‍ നടപടികളും യോഗത്തില്‍ ചര്‍ച്ച ചെയ്യും.
രാഹുല്‍ഗാന്ധിക്കെതിരെ മുതിര്‍ന്ന കോണ്‍ഗ്രസ് നേതാവ് പി.ജെ കുര്യന്‍ നടത്തിയ പരാമര്‍ശനത്തിനെതിരെയും ചര്‍ച്ച ഉണ്ടായേക്കും. പി.ജെ കുര്യനെതിരെ നടപടിയെടുക്കണമെന്നാവശ്യപ്പെട്ട് ടി എൻ പ്രതാപൻ എം പി കോൺഗ്രസ് രാഷ്ട്രീയകാര്യ സമിതിയെ സമീപിച്ചിരുന്നു.
